Ўзбекистон Глобал тинчлик индексида 104-ўринни эгаллади

Тошкент. 20 июн. ЎзТАГ – Ўзбекистон Глобал тинчлик индексида 104-ўринни эгаллади, дея хабар беради Ўзбек телеграф агентлиги (ЎзТАГ).
Ушбу индекс австралиянинг Иқтисодиёт ва тинчлик институти сайтида эълон қилинган.
Индексга мувофиқ, Марказий Осиёдаги энг тинчликсевар мамлакат сифатида Туркманистон деб топилди (95-ўрин). Ундан кейинги Қозоғистон 103-ўринда жойлашди. Қизиғи, ушбу мамлакат ўтган йилги индексда 78 ўринда эди. Ўзбекистондан кейинги ўринларда Қирғизистон (125-ўрин) ва Тожикистон (126-ўрин) жойлашган.
Умуман, индексга кўра, дунёнинг энг тинчликсевар мамлакатлари сифатида Исландия, Дания ва Австрия қайд этилган. Рейтингнинг охиридан эса Судан, Афғонистон ва Сурия мамлакатлари жой олган.
Эслатиб ўтамизки, Глобал тинчлик индекси – социолог ва иқтисодиётчилар томонидан ишлаб чиқарилган рейтинг бўлиб, у мамлакат ва ҳудудларнинг нисбатан тинчликсеварлигини характерлайди. Мамлакатлар индексда 23 кўрсаткич бўйича баҳоланади. Индекс муаллифи австралиялик тадбиркор Стив Киллелеадир.