Ўзбекистон қишлоқ хўжалик техникасини модернизация қилишга $127,9 млн йўналтиради

Тошкент. 15 май. ЎзТАГ – Яқин йилларда Ўзбекистон қишлоқ хўжалик техникаси ишлаб чиқаришни модернизация қилиш ва сервис хизматлари кўрсатишга $127,9 млн йўналтиради, деб хабар беради Ўзбек телеграф агентлиги (ЎзТАГ).

“Инвестиция дастурига мувофиқ Тошкент қишлоқ хўжалик техникаси заводи, Чирчиқ қишлоқ хўжалик техникаси заводини модернизация қилиш ва технологик қайта жиҳозлаш ишлари амалга оширилади. Мамлакатда илк конструкторлик бюроси ташкил этилиб, у ишлаб чиқаришга интеграция қилинади”, - деб таъкидлашди “Ўзагротехсаноатхолдинг”да.

Бугунги кунда янги холдинг қишлоқ хўжалик техникасини локализация қилиш мақсадларида бешта қўшма корхоналарни ташкил қилди. Булар “Амкадор” ва “Бобруйскагромаш” (Беларусь), LSMtron (Жанубий Корея), “Ростсельмаш” (РФ), KUHN (Франция) каби хорижий ширкатлар билан ташкил этилган қўшма корхоналардир. Ушбу лойиҳалар бўйича 30 дона атрофида техника ишлаб чиқарилди.