Ўзбекистон ХУВТ тўлақонли аъзоси бўлди

Тошкент. 28 ноябр. ЎзТАГ – Ўзбекистон Халқаро узумчилик ва виночилик ташкилотининг (ХУВТ) тўлақонли аъзоси бўлди, деб хабар беради Ўзбек телеграф агентлиги (ЎзТАГ).

Ўзбекистон Ташқи ишлар вазирлиги маълумотига кўра, бу ҳақида ХУВТнинг 23 ноябр куни Пунта-дель-Эсте (Уругвай) шаҳрида бўлиб ўтган Бош ассамблеясининг 16-сессиясида эълон қилинди.

Форумда 50 дан ортиқ мамлакат ва халқаро тузилмалардан 500 га яқин делегатлар иштирок этдилар.

“ХУВТнинг йиғилиши Ўзбекистоннинг АҚШдаги элчиси Жавлон Вахабов бошчилигидаги Ўзбекистон делегациясига ташкилотнинг расмий байроғини тантанали топширишдан бошланди. Ушбу маросим мамлакатнинг ташкилотга қабул қилинишини билдиради. Ўзбекистон ХУВТнинг 47-чи аъзоси бўлди”, - дейилади хабарда.

Таъкидланишича, Ўзбекистон бугунги кунда Марказий Осиёда узум ва уни қайта ишлашдан олинадиган маҳсулотларнинг асосий ишлаб чиқарувчи ҳисобланади. Бу саноат учун қулай иқлим шароитлари бу ерда қишда сақлаш ва узоқ масофаларга жўнатиш учун зарур хусусиятларга эга бўлган виноларнинг юқори навли майиз-узум, истеъмол турларини, шунингдек, турли хил шароб, шарбатлар, концентратлар, бренди ва ўйноқи вино ишлаб чиқариш учун хом ашё бўлган навларни етиштиришга имкон беради.

Шунингдек, учрашувда Ўзбекистон делегацияси 2021 йилда ХУВТнинг Бош Ассамблеяси мажлиси ва Бутунжаҳон Конгрессини Самарқанд шаҳрида ўтказишни таклиф қилди.

Бундан ташқари, сессия давомида ташкилотнинг янги бош директори сайловлари бўлиб ўтди. Аъзо давлатлар вакиллари томонидан овоз бериш натижалари бўйича Испания виночилар федерацияси президенти Пау Рокка Баско ХУВТнинг янги бош директори этиб сайланди. У 2019 йил 1 январдан ўз вазифасини бажаришга киришади.

П.Р. Баско билан учрашув чоғида, унинг янги лавозимдаги биринчи хорижий сафарини 2019 йил январ ойи бошида Ўзбекистонга уюштириш тўғрисида келишиб олинди.

ХУВТ БАсининг навбатдаги учрашуви 2019 йил июл ойида Женевада (Швейцария) бўлиб ўтади.

Сурат манбаи: https://www.pinterest.es