Ўзбекистон кино усталари саккизта янги фильмларни суратга олмоқдалар

Тошкент. 3 июл. ЎзТАГ – Ўзбек кино усталари “Ўзбеккино” миллий агентлиги буюртмасига биноан бирйўла саккизта бадиий, битта саргузашт эртак ва битта тўлиқ метражли анимацион фильмни суратга олиш устида иш олиб бормоқдалар, дея хабар беради Ўзбек телеграф агентлиги (ЎзТАГ).
“Бир йўла олтита бадиий фильм, биттадан саргузашт эртак ва тўлиқ метражли анимацион фильмлар мамлакатнинг асосий киностудияси – “Ўзбекфильм” киностудиясида суратга олинмоқда. Хусусан, “Ер тафти” бадиий фильми таниқли режиссёрлар Шуҳрат Аббосов ва Нозим Аббосовлар томонидан олинмоқда. Ёш кинорежиссёр Ёлқин Тўйчиев эса ўзи ёзган сценарий бўйича “Ҳаёт-да...” фильмини суратга олмоқда. Бундан ташқари, киностудияда “Қуёш юрти паҳлавони” тўлиқ метражли анимацион фильми ва “Ойқиз эртаги” номли саргузашт фильмлар ҳам суратга олинмоқда”, - деб қайд этишди “Ўзбеккино” миллий агентлиги матбуот хизматида.
Шунингдек, “Ватан” киностудияси ва “Ёшлар ижодий тажриба 5-студиясида “Гумроҳлар” ва “Соя” бадиий фильмларини суратга олишга киришилди.