Ўзбекистон МБ раиси Файзулла Муллажонов оламдан ўтди

Тошкент. 24 май. ЎзТАГ – 23 майда Ўзбекистон банк тизимининг асосчиларидан бири, моҳир раҳбар, Марказий банки раиси Файзулла Мақсуджонович Муллажонов 67 ёшида узоқ давом этган касаллигидан сўнг тўсатдан оламдан ўтди, деб хабар беради Ўзбек телеграф агентлиги (ЎзТАГ).

Ўзбекистон президенти Шавкат Мирзиёев, парламент ва ҳукумат раҳбарлари томонидан имзоланган таъзиянома ЎзА сайтида эълон қилинган.

Ана шу ўта масъулиятли лавозимда қарийб 26 йил самарали фаолият кўрсатиб, Ф.Муллажонов эски маъмурий-буйруқбозлик тизимидан бозор иқтисодиёти муносабатларига ўтиш жараёнида банк-молия тизимини шакллантириш ва ривожлантириш, миллий валютамизни жорий этиш, олтин-валюта захирасини мустаҳкамлаш, банк соҳаси учун замонавий кадрлар тайёрлаш борасида ўзининг юксак ташкилотчилик ва ташаббускорлик қобилиятини намоён этди. 

“Ф.Муллажоновнинг Ўзбекистон банк тизимини халқаро талаб ва мезонлар асосида тараққий топтириш, унинг кадрлар салоҳиятини мустаҳкамлаш, жаҳон миқёсидаги обрў-эътиборини ошириш борасидаги катта хизматлари халқимизга яхши маълум.

 Бугунги кунда мамлакатимиз иқтисодиётининг турли соҳа ва тармоқларида хизмат  килаётган кўплаб раҳбар ходимлар, банк-молия мутахассислари ҳақли равишда ўзларини Ф.Муллажоновнинг шогирдлари, деб ҳисоблайдилар. 

 Ф.Муллажоновнинг кўп йиллик самарали хизматлари давлатимиз томонидан муносиб тақдирланган. У “Ўзбекистон Республикасида хизмат кўрсатган иқтисодчи” фахрий унвони, “Меҳнат шуҳрати” ва “Фидокорона хизматлари учун” орденлари билан мукофотланган эди. 

Ўзбекистон банк-молия соҳасининг йирик намоендаси, меҳрибон устоз, камтарин инсон Файзулла Муллажоновнинг хотираси қалбимизда ҳамиша сақланиб қолади”, - дейилади таъзияномада.

 Эслатиб ўтамизки, Ф.Муллажонов 1950 йили Сирдарё вилоятида туғилди. 1971 йили Тошкент халқ хўжалиги институти (ҳозирги Тошкент давлат иқтисодиёт университети)ни иқтисодчи мутахассислиги бўйича тамомлади. Меҳнат фаолиятини давлат банки Сирдарё вилояти бўлимида кредит назоратчиси вазифасидан бошлади. Кейинчалик ушбу вилоятда банк соҳасида турли масъул лавозимларда хизмат қилди. 

Ф.Муллажонов 1991 йилда Ўзбекистон Республикаси Марказий банки раиси этиб тайинланган эди.