Ўзбекистон Миллий авиакомпанияси Бишкекдан Samsung Note 7 олиб ўтишни таъқиқлади
Тошкент. 30 декабр. ЎзТАГ – “Ўзбекистон ҳаво йўллари” Миллий авиакомпанияси ўз рейсларида Бишкекдан Samsung Note 7 телефонини олиб ўтишни таъқиқлади, деб хабар беради Ўзбек телеграф агентлиги (ЎзТАГ) МАК матбуот хизматига асосланган ҳолда.
“Авиация хавфсизлиги бўйича аэропорт қўмитасининг 2016 йилнинг 22 декабридаги қарорига кўра 2017 йилнинг 1 январидан бошлаб Бишкек шаҳрининг “Манас” аэропортидан Samsung Note 7 смартфонларини багаж ва қўл юки таркибида олиб кетиш таъқиқланади”, - дейилади хабарда.
“Ўзбекистон ҳаво йўллари” йўловчиларни ушбу чекловларга қатъий амал қилишини сўрайди.
Олдин хабар берилгани каби, “Ўзбекистон ҳаво йўллари” Миллий авиакомпанияси октябрда Samsung Note 7ни Малайзиядан рейсларда олиб ўтишни таъқиқлаган эди. Чекловлар Samsung Note 7 смартфонининг ёниб кетиши билан боғлиқ жорий этилган эди.
Эслатиб ўтамизки, 10 октябрда Samsung Galaxy Note 7 смартфони ишлаб чиқарилиши бутунлай тўхтатилгани ҳақида хабар қилган эди. Бу янги партиядаги смартфон ХХР фуқароси қўлида портлаб кетганидан кейин қабул қилинди. Жанубий Корея компаниясида бунинг сабаби қурилмага ўрнатилган носоз аккумуляторлар деб кўрсатилди.
