Ўзбекистон миллий авиакомпанияси Сингапурда реклама кампанияси ўтказди
Тошкент. 7 август. ЎзТАГ – “Ўзбекистон ҳаво йўллари” миллий авиакомпанияси Сингапурнинг “Changi” аэропорти билан биргаликда кенг кўламли реклама кампанияси ўтказди, деб хабар беради Ўзбек телеграф агентлиги (ЎзТАГ).
“Ўзбектуризм” миллий компанияси матбуот хизмати маълумотларига кўра, уни ўтказишдан кўзланган мақсад “Changi” аэропортига ташриф буюрувчиларни Ўзбекистоннинг тарихи ва замонавий ривожланиши билан таништириш, авиаташувларни кенгайтириш ва Сингапурдан Ўзбекистонга йўловчилар сонини кўпайтириш бўлган.
Кампания доирасида кенг шаклдаги суратлар ёрдамида Самарқанд, Бухоро, Хива, Тошкентнинг қадимий меъморчилик обидалари ва уларнинг макетлари, анъанавий миллий кийим-кечаклар, халқ амалий санъати намуналари экспозицияси ташкил этилди. Ўзбекистон ҳақидаги батафсил маълумотлар келтирилган 15 кўргазма композицияси “Changi” аэропортининг 3 терминалида намойиш қилинди.
