Ўзбекистон Мянмадаги қочқинларга гуманитар ёрдам йўллайди
Тошкент. 13 сентябр. ЎзТАГ – Ўзбекистон Мянмадаги қочқинларга гуманитар ёрдам йўллайди, деб хабар беради Ўзбек телеграф агентлиги (ЎзТАГ) республика ташқи ишлар вазирлиги матбуот хизматига асосланган ҳолда.
Таъкидланишича, “Мянмада юзага келаётган вазият, хусусан, мамлакатдаги озчиликни ташкил этувчи мусулмонларга кўрсатилаётган зўравонлик ҳолатлари ҳақидаги хабарлар Ўзбекистонда ташвиш билан қарши олинди”.
“Инсон ҳуқуқлари умумжаҳон декларацияси ва Бирлашган Миллатлар Ташкилоти низоми, шунингдек, Ислом ҳамкорлик ташкилоти Низоми мақсад ва вазифаларига таянган ҳолда Ўзбекистон зўравонликнинг ҳар қандай кўринишини қоралайди ва ирқи, ранги, жинси, тили, дини, сиёсий ёки бошқа эътиқодлари, миллий ёки ижтимоий келиб чиқиши, мулкий, туғилиши ёки бошқа ҳолатлар билан боғлиқ белгиларидан қатъий назар, ҳар бир инсон барча ҳуқуқ ва эркинликлар билан сўзсиз таъминланиши тарафдори эканлигини маълум қилади”, - дейилади хабарда.
Шу муносабат билан, Ўзбекистон Мянма ҳукуматини бегуноҳ мусулмонларга қарши зўравонлик хатти-ҳаракатларни тўхтатишга ва бу ҳодисанинг олдини олиш учун барча зарур чораларни кўришга ҳамда муаммони фақатгина тинч йўл билан ҳал этишга чақиради.
“Шунингдек, Ўзбекистон Республикаси ТИВ Ўзбекистон ҳукумати томонидан мянмалик қочқинларнинг эҳтиёжлари учун уларга инсонпарварлик ёрдамини юбориш тўғрисида қарор қабул қилингани ҳақида хабар қилади”, - дейилади хабарда.
Эслатиб ўтамизки, Мянмадаги Ракхайн штатида республика қуролли кучлари ва “Рохинжа Аракан армияси”га мансуб мусулмонлар ўртасида тўқнашувлар бўлиб ўтмоқда.
Мьянма ҳукумати юқоридаги мусулмонларни террористлар деб ҳисоблайди. Фақат кейинги ҳафтанинг ўзида камида 400 киши ўлдирилди. Камида 40 минг киши қўшни Бангладеш ёки Бенгаль бўғозидаги кимсасиз оролларга кўчиб кетди.
