Ўзбекистон нефтегаз соҳасида қўшма лойиҳаларни амалга ошириш учун Хитой компаниясини жалб қилиш ниятида
Тошкент. 28 ноябр. ЎзТАГ – Ўзбекистон нефтегаз соҳасида қўшма лойиҳаларни амалга ошириш учун хитойнинг CITIC Construction компаниясини жалб қилиш ниятида, деб хабар беради Ўзбек телеграф агентлиги (ЎзТАГ).
“Ўзбекнефтегаз” МХКда Хитой компаниясининг вице-президенти Ян Цзяньцян билан учрашув бўлиб ўтди. Йиғилишда ўзбек компаниясининг фаолияти, мамлакатда амалга оширилаётган инвестиция сиёсати, амалга оширилаётган лойиҳалар ҳақида маълумот берилди.
Қайд этилишича, бугунги кунда 2030 йилгача бўлган даврда нефть ва газ саноатини ривожлантириш концепцияси ишлаб чиқилмоқда, унда соҳани ислоҳ қилишнинг асосий йўналишлари белгилаб берилади.
Унда инвестицион лойиҳаларни амалга ошириш, шу жумладан, МТО технологиясидан фойдаланган ҳолда табиий газни чуқур қайта ишлаш, республиканинг 2 та нефтни қайта ишлаш заводини (Фарғона нефтни қайта ишлаш заводи ва Бекобод нефтни қайта ишлаш заводи) модернизация қилиш ва “Ўзбекистон-Хитой” газ қувурининг тўртинчи тармоғини қуришга алоҳида эътибор қаратилади.
“CITIC Construction компаниясининг Ўзбекистонда Қўнғирот сода заводи ва Деҳқонобод калий заводларини қуришдаги иштироки тажрибасига эгалигидан келиб чиққан ҳолда, делегация аъзоларига “Ўзбекнефтгаз” АЖнинг лойиҳаларида инвестор ва ҳамкор сифатида иштирок этиш имкониятини кўриб чиқиш таклиф этилди”, - дейилади ўзбек компаниясининг матбуот хизматининг хабарида.
Бундан ташқари, Хитой томони “Ўзбекнефтгаз” АЖ лойиҳаларини сармоя қилиш ва тенг шартларда уларда иштирок этишдан манфаатдорлигини исҳор этди. Ўз навбатида CITIC Construction компанияси вакиллари Фишер-Тропш технологиясидан фойдаланган ҳолда базавий ёғларни биргаликда ишлаб чиқариш имкониятларини кўриб чиқишни таклиф қилдилар.
Томонлар музокаралар якунлари бўйича мулоқотни давом эттиришга ва самарали ҳамкорликнинг бошқа йўналишларини кўриб чиқишга тайёрлигини билдирдилар.
Сурат манбаи: http://www.ca-irnews.com
