Ўзбекистон нефтегаз тармоғини $18,6 млрдга модернизация қилади

Тошкент. 13 май. ЎзТАГ – Ўзбекистон нефтегаз тармоғида умумий қиймати $18,65 млрдга тенг бўлган 54 лойиҳани амалга ошириш режалаштирилмоқда, деб хабар қилади Қозоқ телеграф агентлиги (КазТАГ) “Ўзбекнефтегаз” миллий холдинг компанияси (МХК) вакили Шокир Файзуллаевга асосланган ҳолда.

“Қабул қилинган дастурга мувофиқ умумий қиймати $18,65 млрдга тенг бўлган лойиҳаларни амалга ошириш кўзда тутилмоқда. Улар доирасида нефтегаз саноатини диверсификация ва модернизация қилиш режалаштирилмоқда”, - деди Ш.Файзуллаев чоршанба куни Gas Uzbekistan-2015 халқаро кўргазмаси доирасидаги конференцияда.

Дастур 2015-2019 йилларда нефтегаз тармоғида ишлаб чиқаришни модернизация, техник ва технологик янгилаш бўйича 54 лойиҳани ўз ичига олган.

Юқоридаги режаларни амалга ошириш 8,55 млрд кубометр газ, 71,7 минг тонна нефть ва 161 минг тонна газоконденсат қазиб олиш, шунингдек, 361,2 минг тонна суюлтирилган газ, 742 минг тонна полиэтилен, 500 минг тонна полипропилен, 863 минг тонна бензин ва 304 минг тонна керосин ишлаб чиқаришга имкон беради.