Ўзбекистон олий таълим муассасаларида стипендиялар тўлаш тартибига ўзгартишлар киритилди

Тошкент. 7 июл. ЎзТАГ – Ўзбекистонда икки ёшгача бўлган болалари бўлиб, кундузги бўлимда ўқишни давом эттираётган талабаларга эндиликда олдингидаги каби ҳам стипендия, ҳам болага қараганлик учун ҳар ойлик кумак пули ўрнига фақат стипендия тўланади. Бу олий ва ўрта махсус таълим вазирлиги ва молия вазирлигининг қўшма қарори билан кўзда тутилган, деб хабар беради Ўзбек телеграф агентлиги (ЎзТАГ).

Адлия вазирлигидан хабар қилишларича, хужжат 30 июнда 1339-4-сон билан рўйхатга олинган. Унинг билан Олий таълим муассасалари талабаларига стипендиялар белгилаш ва тўлаш тартиби тўғрисидаги низомга ўзгартиш ва қўшимчалар киритилган.

Шунингдек, энди академқарздорликни белгиланган тартибда ва муддатда топширган талабаларга стипендия қарздорлик ёпилган санадан кейинги ойнинг биринчи кунидан бошлаб тўланади. Бунда талабанинг кейинги ўқув семестригача ўзлаштиришидан келиб чиқиб турли коэффициентлар қўлланади.

Олдинлари стипендия академқарздорлик топширилганидан кейинги ойнинг 1 кунидан 0,5 коэффициентини қўллаган ҳолда тўланар эди.

Тошкент юридик институти учун бу ерда модулли таълим тизими жорий этилиши билан талабаларга ўқув йилида 2 марта стипендия белгилаш тартиби жорий этилмоқда. Айни пайтда стипендиялар ҳар ўқув семестри ойининг биринчи кунидан бошлаб якуний назорат натижалари эълон қилинганидан кейин тўлана бошлайди.