Ўзбекистон Oxus Gold plc компаниясини арбитраж судида ютди
Тошкент. 18 апрел. ЎзТАГ – Ўзбекистон Oxus Gold plc компаниясини (Буюк Британия) узоқ вақт давом этган арбитраж судида ютди, деб хабар беради Ўзбек телеграф агентлиги (ЎзТАГ).
“Асосан “Омонтойтов Голдфилдз” ва “Хандиза” лойиҳаларини амалга оширган компания Ўзбекистонга қарши гўёки Британия ва Ўзбекистон ўртасидаги инвестицияларни ҳимоя қилиш ва рағбатлантириш тўғрисидаги ҳукуматлараро келишувни бузганлик учун 2011 йилда $1,3 млрдлик даъво очган эди”, - дейилади White&Case LLP халқаро юридик компанияси хабарида.
Узоқ давом этган суд муҳокамаларидан кейин, UNCITRAL трибунали ҳайъати “Oxus Gold plc” даъволарининг 99%ни ўринсиз деб топди ва Ўзбекистон ҳаракатини мутлақо қонуний эканини тасдиқлади. Хусусан, ҳакамлар ҳайъати компания киритган даъвода кўзда тутилган “Хандиза” кони борасидаги $780 млнлик талабларни тўлиқ рад этди.
Трибунал ўзбек томонининг “Oxus Gold plc” ҳеч қачон “Хандиза” конида қазиш ишларини олиб бориш ҳуқуқига эга бўлмагани, фақатгина икки томонлама фойдали шароитларда музокаралар олиб бориш ҳуқуқига эга бўлганига доир далилларини асосли деб топган.
Трибунал шунингдек, мазкур келишувларнинг бузилишига Ўзбекистон эмас, “Oxus Gold plc” жавобгар деган хулосага келган. Oxus Gold plc ширкати ҳеч қачон конни ўзлаштириш қарорининг чўзилиши ҳуқуқига эга бўлмаган, ва шартномага кўра, ушбу ҳолат қайтарилмайдиган харажатларга кирмайди.
Бундан ташқари, трибунал “Oxus Gold plc”нинг Ўзбекистон геология ва минерал ресурслар бўйича давлат қўмитаси ва Навоий тоғ-металлургия компанияси билан ҳаммуассисликда ташкил этилган “Омонтойтов Голдфилдз” қўшма корхонасига киритган $550 млн инвестициядан гўёки мажбурий маҳрум қилинганига доир даъвоси ҳам бутунлай рад этилди.
Эслатиб ўтамизки, нодир металлар қазиб чиқаришга ихтисослашган “Oxus Gold plc” компанияси Ўзбекистонда ўзининг шўъба компаниялари – “Oxus Resources Corporation Ltd” ва “Marakand Minerals Ltd” орқали 1997 йилда фаолият бошлаган эди.
