Ўзбекистон президенти Озарбайжон президентини мамлакатга давлат ташрифи билан келишга таклиф қилди

Тошкент. 13 апрел. ЎзТАГ – Ўзбекистон президенти Шавкат Мирзиёев Озарбайжон президенти Илҳом Алиевни мамлакатга давлат ташрифи билан келишга таклиф қилди, деб хабар беради Ўзбек телеграф агентлиги (ЎзТАГ).

Ушбу таклиф улар орасида 12 апрелда бўлиб ўтган телефон мулоқотида очиқланди.

“Давлатимиз раҳбари Илҳом Алиевни куни кеча (11 апрелда – ЎзТАГ) бўлиб ўтган Озарбайжон Президенти сайловида ишончли ғалабага эришгани билан самимий табриклади. Сайлов натижалари қардош озарбайжон халқи Илҳом Алиевни кенг қўллаб-қувватлаши ва унга улкан ишонч билдиришини, давлат раҳбарининг шахсий хизматлари ҳамда мамлакатда барқарорликни, изчил иқтисодий тараққиётни таъминлаш, халқаро нуфузини мустаҳкамлаш борасида амалга оширилаётган самарали сиёсатни юксак баҳолашини яна бир бор намоён этгани алоҳида таъкидланди”, - дейилади Ўзбекистон президенти матбуот хизматининг хабарида.

Кўп асрлик дўстлик ва стратегик шерикликка асосланган Ўзбекистон ва Озарбайжон муносабатлари изчил ривожланаётгани ва мустаҳкамланиб бораётгани чуқур мамнуният билан қайд этилди. Халқларимизнинг тарихи, маданияти ва дини умумий, маънавий қадриятлари, анъана ва урф-одатлари муштарак, дея қайд этилади шундан сўнг.

Турли даражадаги фаол мулоқотлар икки томонлама ўзаро манфаатли ҳамкорликни янада кенгайтириб, уларни аниқ мазмун билан бойитишга хизмат қилгани қайд этилди.

“Ўзаро савдо ҳажми барқарор юксак суръатлар билан ўсмоқда, икки мамлакат етакчи компаниялари иштирокида иқтисодиёт тармоқлари, жумладан, нефть-газ мажмуида истиқболли кооперация лойиҳалари ишлаб чиқилмоқда. Янги «Боку – Тбилиси – Ахалкалаки – Карс» темир йўл магистрали, шубҳасиз, бутун минтақада савдо-иқтисодий алоқаларни ривожлантириш ва транзит салоҳиятини рўёбга чиқаришга хизмат қилиши алоҳида таъкидланди”, - дейилади хабарда.

Фаол маданий-гуманитар алмашинувлар давом этмоқда, қўшма тадбирлар мунтазам ўтказилмоқда.

Давлатлар раҳбарлари, шунингдек, Ўзбекистон – Озарбайжон кўп қиррали ҳамкорлиги, минтақавий ва халқаро аҳамиятга молик долзарб масалалар юзасидан фикр алмашдилар.

“Мулоқот якунида Ўзбекистон Республикаси Президенти Шавкат Мирзиёев Озарбайжон Республикаси Президенти Илҳом Алиевни мамлакатимизга давлат ташрифи билан келишга таклиф этди. Озарбайжон Президенти давлатимиз раҳбарига самимий табрик ва эзгу тилаклар учун чуқур миннатдорлик билдириб, Ўзбекистонга ташриф билан келиш таклифини мамнуният билан қабул қилди”, - деб хулоса қилинади хабарда.

Сурат манбаи: https://www.gazeta.uz/ru/2018/04/12/talk/