Ўзбекистон Президенти ўз мамлакатлари ва минтақаларига фаол таъсир қилаётган дунёдаги етакчилар ўнталигига кирди
Тошкент. 6 январ. ЎзТАГ – Ўзбекистон Президенти Шавкат Мирзиёев ўз мамлакатлари ва минтақаларига фаол таъсир қилаётган дунёдаги етакчилар ўнталигига кирди, деб хабар беради Ўзбек телеграф агентлиги (ЎзТАГ) “Жаҳон” ААга асосланган ҳолда.
Бу ишни Туркиянинг етакчи иқтисодий нашрларидан бири Derin Ekonomi журналининг шарҳловчилари амалга оширдилар.
“Мазкур рўйхатдан муҳим аҳамиятга молик қарорлари билан ўз мамлакатлари ва минтақаларидаги мавжуд вазиятни ўзгартириб юборадиган ва бу билан халқаро майдондаги вазиятга фаол таъсир кўрсатадиган ҳамда жаҳон оммавий ахборот воситаларининг “ньюсмейкери” бўлиб қолаётган етакчилар номлари жой олди”, - дейилади хабарда.
Мутахасссисларнинг таъкидлашларича, Шавкат Мирзиёев Ўзбекистон Республикаси Президенти этиб сайланган биринчи кунларданоқ мамлакатни ялпи либераллаштириш, “ҳар ерда ҳозиру нозир” бўлган ҳуқуқ-тартибот идоралари фаолиятини тартибга солиш, диний эътиқод эркинлигини таъминлашга қаратилган чуқур ислоҳотларни ҳаётга татбиқ этмоқда.
Таъкидланганидек, янги раҳбарият бошчилигида Ўзбекистонда мамлакатни амалда эркин бозор сари ҳаракатлантиришга ҳамда ташқи савдо ва валюта сиёсатини либераллаштиришга йўналтирилган ўта муҳим қарорлар қабул қилингани хорижлик сармоядорлар учун республиканинг жозибадорлигини оширди.
Бошқа давлатлар, биринчи навбатда, қўшни мамлакатлар билан ўзаро муносабатларни тубдан яхшилаш йўлини тутгани Шавкат Мирзиёевнинг Ўзбекистон Президенти лавозимидаги энг катта эътиборга муносиб қадамларидан бири бўлди.
Турк нашрларида қайд этилишича, мазкур рейтингдан жой олган ўн мамлакат етакчиларининг исм-шарифлари, эҳтимол, шу пайтга қадар жаҳон ҳамжамияти учун таниқли бўлмаган, бироқ 2018 йили улар «ҳар бир кишига ўзларини танитишади».
Сурат манбаи: http://www.albayrakmedya.com/markalar/derin-ekonomi-dergisi/
