Ўзбекистон президенти “Женерал электрик” компанияси вице-президентини қабул қилди
Тошкент. 16 феврал. ЎзТАГ – Ўзбекистон Республикаси Президенти Шавкат Мирзиёев 2018 йил 15 февраль куни мамлакатимизда амалий ташриф билан бўлиб турган АҚШнинг "Женерал электрик" компанияси вице-президенти Рональд Жеймс Поллеттни қабул қилди, деб хабар беради давлат раҳбарининг матбуот хизмати.
“Учрашувда "Женерал электрик" компаниясининг мамлакатимиздаги фаолияти кенгайиб бораётгани мамнуният билан қайд этилди. Бугунги кунда Ўзбекистонда энергетика инфратузилмаси объектларини модернизация қилиш, жумладан, Тахиатош иссиқлик электр станциясида замонавий буғ-газ қурилмаларини қуриш, Тошкент иссиқлик электр станцияси қувватларини кенгайтиришнинг иккинчи босқичини амалга ошириш, Пском гидроэлектр станциясини барпо этиш, газ етказиш тизимини ривожлантириш борасида қатор устувор лойиҳалар, шунингдек, фуқаро авиацияси ва соғлиқни сақлаш соҳаларида қўшма дастурлар ишлаб чиқилмоқда ва амалга оширилмоқда”, - дейилади хабарда.
Шундан кейин таъкидланишича, давлатимиз раҳбари энергетика тармоғидаги ўзаро манфаатли технологик шериклик ҳамда ишлаб чиқариш кооперацияси соҳасидаги ҳамкорликни янада кенгайтириш муҳимлигини алоҳида таъкидлади. Мамлакатимизда, жумладан, хорижнинг етакчи мутахассислари ва экспертларини жалб қилган ҳолда, юқори малакали кадрлар тайёрлаш соҳасидаги ҳамкорлик масалаларига алоҳида эътибор қаратилди.
Рональд Жеймс Поллетт Президентимиз Шавкат Мирзиёевга самимий қабул ҳамда юқори технологияли тармоқларда икки томонлама ҳамкорликка доир лойиҳа ва дастурларни ҳар томонлама қўллаб-қувватлагани учун чуқур миннатдорлик билдирди. У “Женерал электрик” компанияси мамлакатимиз корхона ва ташкилотлари билан узоқ муддатли ва кенг кўламли ҳамкорликни янада ривожлантиришга тайёр эканини таъкидлади.
Эслатиб ўтамизки, “Женерал электрик” дунёдаги етакчи кўптармоқли корпорациялардан биридир. Унинг фаолияти энергетика, машинасозлик, аниқ асбобсозлик, электротехника, автоматлаштирилган бошқарув тизимлари, тиббий технологиялар, молия тармоғи ва кўплаб бошқа соҳаларни қамраб олади. Компания жаҳоннинг 180 ортиқ мамлакатида фаолият юритади. Унда 300 мингдан зиёд киши меҳнат қилади. Ўтган йил якунлари бўйича америка компаниясининг даромадлари $120 млрддан ошди.
Сурат манбаи: http://www.uza.uz/ru/business/ronald-dzheyms-pollett-uzbekistan-strana-s-ogromnym-potentsi-15-02-2018
