Ўзбекистон Россияда ишлаётган ноқонуний меҳнат муҳожирлари орасида иккинчи ўринни эгаллади

Тошкент. 27 октябр. ЎзТАГ – Ўзбекистон Россияда ишлаётган ноқонуний меҳнат муҳожирлари орасида иккинчи ўринни эгаллади, деб хабар беради Ўзбек телеграф агентлиги (ЎзТАГ) россия ОАВ асосланган ҳолда.

Россия Ички ишлар вазирлиги Миграция масалалари бўйича бош бошқармаси бошлиғининг биринчи ўринбосари Андрей Краюшкиннинг Давлат думаси хавфсизлик қўмитаси йиғилишда айтишича, “Россия Федерациясига келаётган хорижий фуқароларнинг асосий қисмини МДҲ фуқаролари ташкил этади”. “Бу РФга кирувчи барча хорижий фуқароларнинг 67%. Россия Федерациясига кираётган Европа Иттифоқи мамлакатлари фуқароларининг улуши 10,9%, Хитой фуқаролари эса 8,5%ни ташкил қилади”, - деб қўшимча қилди у.

Кириб келган мигрантларнинг энг катта қисмини Украина – 19,4%, Ўзбекистон – 14,2%, Қозоғистон – 9,9% фуқаролари ташкил қилади.

Умуман олганда, РФ ИИВ ноқонуний меҳнат муҳожирларининг сони камайиб бораяпти деб ҳисоблайди.

“Бугунги кунда мамлакатимизда миграцион вазият Россия Федерациясига келаётган чет элликлар сони, шунингдек, уни тарк ҳам этаётганлар сони қисқариши билан характерланади. Жорий йилнинг январ-сентябр ойларида Россия Федерациясига 14 млн хорижий фуқаро кириб келди, бу ўтган йилнинг шу даврига нисбатан 2,2%га камдир. Мамлакатдан 11,7 млн чет эллик фуқаролар чиқиб кетишди, бу кўрсаткич 7%га камайди”, - деди Краюшкин.

Эслатиб ўтамизки, миграция оқимининг қисқаришига қарамасдан Россияда ҳозирги пайтда 10 млнга яқин хорижлик бор.