Ўзбекистон Сенати тўй тантаналарини тартибга солиш бўйича ҳужжат қабул қилмасликка қарор қилди

Тошкент. 5 июл. ЎзТАГ – Ўзбекистон Олий Мажлисининг Сенати тўй тантаналарини тартибга солиш бўйича алоҳида ҳужжат қабул қилмасликка қарор қилди, деб хабар беради Ўзбек телеграф агентлиги (ЎзТАГ).

Хусусан, бу масала Ўзбекистон Республикаси Олий Мажлиси Сенатининг ўн бешинчи ялпи мажлисида кўриб чиқилди. Унда сенаторлар тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирларни тартибга солиш масаласини муҳокама қилдилар.

Сенаторлар тўй-ҳашам ва бошқа оилавий тадбирларни ихчам ўтказишни йўлга қўйишга меъёрий ҳужжат қабул қилиш орқали эмас, балки одамлар ўртасида кенг кўламли тарғибот-ташвиқот, шахсий ибрат, намунали тадбирлар мисолида эришиш мумкин, деган хулосага келдилар.

Сенаторларнинг фикрича, оилавий тадбирларни миллий қадриятларимиз асосида, камхарж, дабдабалардан холи ўтказишни кенг жамоатчилигимиз ва ҳар бир инсон онгли равишда англаб етмоғи лозим.

Эслатиб ўтамизки, яқинда ОАВ Тошкентнинг Олмазор туманида 30 кишилик тўй ташкил этилгани. Тежаб қолинган маблағларга эса ёшларга квартира олиб бериш учун бошланғич бадал тўлангани ҳақида хабар қилдилар.

Сурат манбаи: https://upl.uz/policy/389-news.html