Ўзбекистон сенаторлари “Инвестиция ва пай фондлари тўғрисида”ги қонунни маъқулладилар

Тошкент. 6 август. ЎзТАГ – Айни дақиқаларда Тошкентда Ўзбекистон Республикаси Олий Мажлиси Сенатининг учинчи ялпи мажлиси бўлиб ўтмоқда. Унда сенаторлар “Инвестиция ва пай фондлари тўғрисида”ги қонунни маъқулладилар, деб хабар беради пайшанба куни Ўзбек телеграф агентлиги (ЎзТАГ).

Қонун муҳокамасида қатнашган сенаторлар қонун инвестиция ва пай фондларини ташкил этиш ва фаолият юритишининг ташкилий ҳуқуқий механизмларини янада такомиллаштириш, республикада жамоавий инвестициялаш тизимининг ривожини рағбатлантириш, аҳоли вақтинча бўш пул маблағларини мобилизация қилиш ва уларни иқтисодиёт турли соҳаларига жалб қилишга қаратилганини таъкидладилар.

“Инвестиция ва пай фондлари фаолиятини тартибга солувчи махсус қонуннинг қабул қилиниши ушбу институтлар алоҳида механизмдан иборатлиги билан боғлиқ. Қонун меъёрлари мамлакат иқтисодиётига инвестициялар олиб келаётган фондларни ривожлантиришга чақиради. Улар орқали маблағлар профессионал бошқарилади, инвестиияларни диверсификация қилиш учун қўшимча имкониятлар очилади”, – деб таъкидлади сенатор Александр Фарманов.

Ушбу фондларнинг ишончли бошқарувчи компаниялар томонидан бошқарилиши майда инвесторлар ва аҳоли ишончини оширади. Инвестиция ва пай фондлари хусусий инвесторлар маблағларини жамлаш, хусусий шахслар маблағларини бошқаришнинг механизмини яратиш, молия бозори турли воситаларига инвестиция қилиш орқали таваккалчиликларни диверсификация қилишга имкон беради. Бундан ташқари, ушбу институтлар қимматли қоғозлар бозорида келишувлар ўтказиш ва уларни сақлаш билан боғлиқ харажатларни қисқартиришга ҳам имкон беради.

Эслатиб ўтамизки, бугун Тошкентда Ўзбекистон Республикаси Олий Мажлиси Сенатининг учинчи ялпи мажлиси очилди.