Ўзбекистон суғуртачилари япон тажрибасини ўрганмоқдалар

Тошкент. 26 феврал. ЎзТАГ – “Ўзбекинвест” Миллий экспорт-импорт суғурта компанияси Токиода Япония Иқтисодиёт, савдо ва саноат вазирлиги (NEXI) томонидан ташкил қилинган тренинг-курсда қатнашди, дея хабар беради Ўзбек телеграф агентлиги (ЎзТАГ).

“Ўзбекинвест”дан хабар қилишларича, компания вакиллари экспорт кредитлари бўйича ташкил этилган бир ҳафталик тренинг-курсда қатнашганлар. Ушбу курс савдо ва инвестициялар суғуртаси учун жавоб берувчи суғурта компаниялари вакиллари учун ташкил этилган.

Тадбирда Бразилия, Хитой, Гонконг, Индонезия, Мьянма, Туркия, Вьетнам ва Жанубий Африка Республикаси экспорт-кредит агентликлари вакиллари ҳам қатнашдилар.

Тренинг давомида Япония Иқтисодиёт, савдо ва саноат вазирлиги ва Япония Экспорт-кредит агентлигининг экспорт кредит ва инвестициялар суғуртаси соҳасидаги тажрибаси, шунингдек, Экспортни илгари суриш ва инвестицияларни жалб қилиш бўйича Япония ташқи савдо ташкилоти тажрибалари ҳам ўрганилди.

Ушбу уқув “Ўзбекинвест” компанияси билан етакчи хорижий экспорт-кредит агентликлари орасидаги ҳамкорлик натижаси бўлди. Бундай ҳамкорлик компаниянинг халқаро суғурта бозоридаги мавқеини мустаҳкамлаш ва энг яхши хорижий суғурта тажрибаларни жорий этишга ёрдам беради.