Ўзбекистон сувни тежайдиган суғориш технологияларини жорий этган фермерларга харажатларининг бир қисмини қоплайди
Тошкент. 14 август. ЎзТАГ – Ўзбекистон сувни тежайдиган суғориш технологияларини жорий этган фермерларга харажатларининг бир қисмини қоплайди, деб хабар беради Ўзбек телеграф агентлиги (ЎзТАГ).
"Ҳукумат қарори мева ва сабзавотларни томчилаб ва ёмғирда суғориш асосида сувни тежайдиган технологияларни жорий этиш учун мева-сабзавот маҳсулотлари етиштириш харажатларини қоплаш тартиби тўғрисидаги Низом тасдиқланди (№664, 12.08.2019 й.). Низомда янги ташкил этилган боғ ва иссиқхона хўжаликларида сувни тежайдиган технологияларни жорий этиш учун мева-сабзавот маҳсулотлари етиштириш харажатларининг бир қисмини қоплаш тартиби белгиланган", - дейилади Адлия вазирлиги матбуот хизмати хабарида.
Қайд этилганидек, 2019 йил ва кейинги йилларда харажатларни қоплаш учун қуйидаги миқдорларда субсидиялар ажратилади: томчилатиб ва ёмғир билан суғориш технологиясини жорий этишда бир гектар майдон учун 6 млн сўмдан ортиқ бўлмаган миқдорда; 35 гектардан ортиқ майдонда жойлашган боғларда сув чиқариш учун қудуқларни, шунингдек, дарёлар, каналлар ва бошқа сув ҳавзаларидан сув олиш учун насос станцияларини қуриш учун 120 млн. сўмдан ортиқ бўлмаган миқдорда.
2019 йилда субсидия маблағлари боғдорчилик ва иссиқхона хўжалигини ривожлантириш агентлиги ҳузуридаги жамғарма ҳисобидан, 2020 йилдан эса жамғарма ва давлат бюджетидан тенг улушларда ажратилади.
"Харажатларнинг бир қисмини қоплашни истаган ишлаб чиқарувчилар қишлоқ хўжалиги ҳудудий бошқармаларига қуйидаги ҳужжатларни тақдим этадилар: суғориш технологиясини жорий этиш бўйича ваколатли лойиҳа институти лойиҳаси, тижорат банки билан кредит шартномасининг нусхаси ва кредит ажратилишини тасдиқловчи ҳужжат, пудратчи ташкилотлар билан тузилган шартнома нусхаси, ишлаб чиқарилган харажатларни тасдиқловчи ҳужжатлар нусхалари" – дейилади хабарда.
Таъкидланишича, Қишлоқ хўжалиги вазирлиги ҳар йили 1 майга қадар келгуси йилда суғориш технологиясини жорий этиш бўйича мева-сабзавот етиштирувчининг якуний рўйхатини тузади ва ҳукуматга тақдим этади.
Сурат манбаи: c-pravda.ru
