Ўзбекистон термаси ФИФА рейтингида Хитой термасидан 25 ўрин олдинда бормоқда ва ўзаро учрашувлар бўйича ҳам етакчилик қилмоқда

Тошкент. 13 январ. ЎзТАГ – Ўзбекистон термаси Халқаро футбол федерацияси (ФИФА) рейтингида Хитой термасидан 25 ўрин олдинда ва ўзаро учрашувлар бўйича ҳам етакчилик қилмоқда, дея хабар беради Ўзбек телеграф агентлиги (ЎзТАГ).

Хусусан, ФИФАнинг 2015 йил 8 январдаги рейтингида Ўзбекистон терма жамоаси 71 ўринни олган бўлса, Хитой термаси 96-ўринни эгаллаган.

1994 йилдан бери икки терма жамоа бир-бири билан 11 ўйин ўйнаган. Бундан 6 ўйинда ўзбекистонлик футболчилар, 3 ўйинда хитойликлар ғолиб чиққанлар, 2 ўйин эса дуранг натижа билан якунланган. Айни пайтда ўзбек футболчилари 18 гол, хитойликлар эса атига 3 гол урганлар.

Бундан ташқари, Ўзбекистон термаси 3:0 ҳисобидаги энг йирик ғалабасини 2007 йил Осиё кубогининг финал қисмида қўлга киритган. Ўз навбатида, Хитой термасининг ўзбекистонликлар устидан энг йирик ғалабаси 2007 йил мартда Макаодаги ўртоқлик ўйинида қўлга киритилган.

Жамоалар ўртасидаги 2015 йилги Осиё кубоги олдидаги энг сўнгги ўйини 2013 йил 6 июнда Гуанчжоуда бўлиб ўтган. Ушбу ўртоқлик учрашуви ўзбекистонликларнинг 2:1 ҳисобидаги ғалабаси билан якунланган.

Эслатиб ўтамизки, Ўзбекистон ва Хитой миллий терма жамоалари 2015 йилги Осиё кубоги гуруҳ босқичи иккинчи тури доирасида 14 январда Брисбен шаҳрида тўқнашади.