Ўзбекистон термаси фудокан карате-до бўйича Сербияда бўлиб ўтган жаҳон чемпионатида 19 совринни қўлга киритди

Тошкент. 24 декабр. ЎзТАГ – Ўзбекистон термаси фудокан карате-до бўйича Сербияда бўлиб ўтган жаҳон чемпионатида 19 совринни қўлга киритди, деб хабар беради Ўзбек телеграф агентлиги (ЎзТАГ).

Ўзбекистон Шарқ яккакурашларини ривожлантириш марказидан хабар қилишларича, дунёнинг 52 мамлакатидан 2 мингдан ошиқ спортчилар қатнашган VI жаҳон чемпионати ўсмирлар, юниорлар, ёшлар, каталар ва ветеранлар ўртасида ўтказилди.

Мусобақалар яккалик, жуфтлик ва жамоавий кураш турларида анъанавий фудокан каратэ-до бўйича барча ёш тоифаларида, болалардан тортиб кадетлар, катталар ва ветеранлар орасида бўлиб ўтди.

Хабар қилинишича, мусобақада Ўзбекистон спортчилари 6 олтин, 4 кумуш ва 9 бронза медалини қўлга киртишди.

Хусусан, жамоавий катада 14-15 ёшли спортчилар орасида Илья Бояркин, Ижод Самиков ва Абдуазим Расуловлар, шунингдек, ўз вазн тоифаларида яккаликда Ижод Самиков ва Шуҳрат Анваров (икки марта) биринчи ўринни олишди. Шоҳсупанинг иккинчи поғонасига Абдуазим Расулов, Жавлон Гилопов ва Рустам Бекмуратовлар (икки марта) кўтарилишди.

Бундан ташқари, яна қатор ўзбек спортчилари жаҳон чемпионатининг “бронза”сини қўлга киритдилар.