Ўзбекистон термаси ўйиндан-ўйинга яхшиланиб бормоқда ва буни очиқ кўриш мумкин – Самвел Бабаян
Тошкент. 9 октябр. ЎзТАГ – Ўзбекистон термасининг ЖЧ-2018 ва ОЧ-2019 саралашларида Баҳрайн устидан 4:0 ҳисобида йирик ғалабасидан кейин терма жамоа бош тренери Самвел Бабаян ўйин ҳақидаги фикрлари билан ўртоқлашди, деб хабар беради Ўзбек телеграф агентлиги (ЎзТАГ) мамлакат Футбол федерация матбуот хизматига асосланган ҳолда.
“Жамоамизнинг миллионлаб мухлисларини муҳим ғалаба билан табриклайман! Биз йигитлар билан ушбу ғалабани жамоани чин дилдан қўллаб-қувватлаб турган ҳақиқий мухлисларга бағишлаймиз. Ўйинга тўхталадиган бўлсам, биринчи бўлимда ўз вазиятларимиздан фойдалана олмагандик. Аммо иккинчи бўлимда буни тўғрилашга эришдик. Бугун биз ўзимизни тартибли жамоа сифатида намойиш эта олдик. Жамоа ўйиндан-ўйинга яхшиланиб боряпти. Менимча, жамоанинг ўсиши яққол сезилиб турибди” - деди С.Бабаян.
Шунингдек, у Ўзбекистон термаси ўйиндан-ўйинга яхшиланиб бораётгани ва буни очиқ кўриш мумкинлигини ҳам таъкидлади.
“Бевосита ўйиннинг ўзига келсак, унда жуда яхши режа асосида ишлаган жамоани кўрдик. Жамоа ўйиндан-ўйинга яхшиланиб бормоқда ва буни очиқ кўриш мумкин”, - деб қўшимча қилди Ўзбекистон термасининг раҳбари.
Унинг сўзларига кўра, Баҳрайн устидан ғалабага тўғри ҳаракатлар эвазига эришилди.
““Бахрайнни кучсиз жамоа дейиш адолатсизлик бўлар эди. Биз рақибни ўрганиш жараёнида унинг рақиблар учун кучли ва ноқулай жамоа эканлигини аниқладик. Филиппин билан ўйинни ҳисобга олмай турамиз, чунки ўша учрашувда Бахрайннинг 5-6та асосий футболчилари ўйнай олмаганди. Шимолий Корея билан ўйинда улар мағлубиятга муносиб ўйин намойиш қилмаганди. Яман билан ўйинни ҳам кўрдик, албатта. Бугун бизнинг ғалабамизни таъминлаган нарса — Бахрайннинг кучсизлиги эмас, биринчи навбатда, бизнинг тартибли ўйин намойиш қилганимиз бўлди. Биз рақибнинг энг кучли қуроли бўлмиш – хужумдаги ўйинини зарарсизлантира олдик”, - деб хулоса қилди Самвел Бабаян.
Эслатиб ўтамизки, кеча 8 октябрда Bahrain National Stadiumда Ўзбекистон термаси Баҳрайн устидан 4:0 ҳисобида йирик ғалаба қозонди. Ўйиндаги голлар Игорь Сергеев, Одил Аҳмедов, Сардор Рашидов ва Элдор Шомуродовлар томонидан киритилди.
