Ўзбекистон ТИВ Россиянинг беш шаҳри ва Алматида консуллик муассасалари очишни режалаштирмоқда
Тошкент. 25 апрел. ЎзТАГ – Ўзбекистон ташқи ишлар вазирлиги Россиянинг беш шаҳри ва Алматида консуллик муассасалари очишни режалаштирмоқда, деб хабар қилди ТИВининг биринчи ўринбосари Жавлон Ваҳобов.
“Бизга вақтинча хорижда бўлган фуқаролардан келиб тушаётган шикоятларнинг танқидий таҳлилидан келиб чиқиб Россиянинг Санкт-Петербург, Қозон, Ростов, Екатеринбург, Владивосток, шунингдек, Қозоғистоннинг Алмати шаҳарларида Ўзбекистон консулхоналари очилиши режалаштирилмоқда”, - деди журналистларга Ж.Ваҳобов 2017-2021 йилларда мамлакат янада ривожлантириш бўйича Ҳаракатлар старатегиясини амалга оширишга бағишланган конференцияда.
Бундан ташқари, у хориждаги консулхоналардаги ходимлар сони ҳам кескин оширилишини айтиб ўтган.
“Қонунчиликдаги бу барча янгиликлар ва ҳаракатлар президент Ш.М.Мирзиёев қўйган бош устивор вазифа – “Ватан фуқароларининг ҳуқуқ ва эркинликларини улар қаерда бўлишларидан қатъий назар муҳофаза қилиш”ни таъминлаши зарур”, - деб таъкидлади Ваҳобов.
Дипломат ҳозир муҳокамада бўлган Консуллик низоми лойиҳаси юқоридаги масалаларни тартибга солиб беришини айтиб ўтди.
Ваҳобовнинг сўзларига кўра, хужжатда кўрсатилаётган консуллик хизматлари рўйхати кенгайтирилган.
“Унда консуллик хизматлари рўйхати кенгайтирилган, жумладан, мамлакат фуқароларига сайлов ҳуқуқларини амалга оширишда кўмаклашиш, одам савдоси қурбонларига ёрдам бериш, фавқулодда вазиятларда ҳимоя қилиш, хужжатларини йўқотганда ватанига қайтишга кўмаклашиш кабилар киритилган. Айни пайтда консуллик вазифаларининг кўпчилиги интерактив шаклга ўтказилиб, онлайн режимда кўрсатилади”, - деб қўшимча қилди у.
