Ўзбекистон ТИВда Аргентина, АҚШ ва Туркия элчилари билан учрашувлар бўлиб ўтди
Тошкент. 11 феврал. ЎзТАГ – Яқинда Ўзбекистон Ташқи ишлар вазирлигида (ТИВ) Аргентина, АҚШ ва Туркия элчилари билан учрашувлар бўлиб ўтди, дея хабар беради Ўзбек телеграф агентлиги (ЎзТАГ).
Бу ҳақидаги маълумотлар ўзбек ташқи сиёсий муассасасининг сайтида мавжуд.
Хусусан, Ўзбекистон Республикаси Ташқи ишлар вазири Абдулазиз Камиловнинг Аргентина Республикасининг янги тайинланган Фавқулодда ва Мухтор Элчиси (қароргоҳи Москва шаҳрида) Пабло Анселмо Теттаманти билан учрашувида элчи Ўзбекистон Республикаси Президенти номига йўлланган ишонч ёрлиқларини топширди.
Бўлиб ўтган суҳбат чоғида сиёсий, савдо-иқтисодий, маданий-гуманитар ва бошқа соҳалардаги Ўзбекистон-Аргентина мулоқотининг мавжуд ҳолати ва ривожлантириш истиқболлари муҳокама қилинди.
Учрашувда муносабатларни институтционаллаштириш ва унга кўп қиррали ҳамкорлик тусини беришга доир аниқ таклифлар ҳам кўриб чиқилди.
Мулоқотда Ўзбекистон ва Аргентина томонларни қизиқтирган қатор соҳаларда ўзаро алоқаларни кенгайтириш учун катта салоҳият ва амалий имкониятларга эга эканлиги таъкидланди.
Шунингдек, томонлар халқаро ташкилотлар доирасидаги ҳамкорлик масалаларини ҳам кўриб чиқдилар.
Шу куннинг ўзида А.Камилов Америка Қўшма Штатлари Фавқулодда ва Мухтор Элчиси Памела Леора Спартленни ҳам қабул қилди.
Томонлар учрашув чоғида ўзбек-америка кун тартибининг долзарб масалалари, шу жумладан, эришилган иккитомонлама келишувларни амалга ошириш жараёни муҳокама қилдилар.
Шунингдек, халқаро ва минтақавий масалалар юзасидан фикр алмашилди.
Ўзбекистон ТИВ раҳбарининг Туркия Республикаси Фавқулодда ва Мухтор Элчиси Намиқ Гунер Эрпул билан учрашувида эса иккитомонлама муносабатларнинг жорий масалалари юзасидан фикр алмашилди.
