Ўзбекистон тожик энергетика тизими билан параллел ишлашга тайёр

Тошкент. 8 ноябр. ЎзТАГ – Ўзбекистон тожик энергетика тизими билан параллел ишлашга тайёр, деб хабар беради Тожик телеграф агентлиги (ТожикТа).

“Ўзбекистон Тожикистон энергия тизими билан параллел ишлаш учун бешта электр узатиш линиясини тайёрлаш ишларини якунига етказди.

Асосий вазифаларимиз орасида – икки мамлакат энергия тизимларининг параллел фаолиятини тиклашдир. Бугунги кунда ўзбек ва тожик энерготизимларини боғловчи тўртта 220 кВ ва битта 500 кВ кучланишга эга линия тайёр бўлди. Айтишим мумкинки, ҳатто биз уларни ишга туширишга тайёрмиз”, - деб хабар қилди “Ўзбекэнерго”нинг стратегик ривожланиш бошқармаси бошлиғи Эсо Саъдуллаев ўзбек ОАВга.

Аммо мутахассиснинг айтишича, мазкур қувватларни ишга тушириш учун маълум бир техник кўрсаткичлар бажарилиши лозим ва улар ҳозирда яратилган қувватлардан фойдаланишга имкон бермайди.

“Ушбу линияларнинг ишончлилигини ва аварияларнинг олдини олишни таъминлаш учун релели ҳимоя ва автоматика лойиҳаси ишлаб чиқилиши даркор. Бу иш тожик томонининг зиммасида. Ҳозирда мазкур лойиҳа ишлаб чиқилмоқда, билишимча, ушбу йўналишда “Росатом”, “Энергосетьпроект” билан музокаралар ўтказилган. Лойиҳа тайёр бўлиши билан мутахассислар Ўзбекистон ва Тожикистон нимстанцияларида қўлланила бошланади ва икки мамлакат энерготизими параллел ишлайдиган бўлади”, - деди “Ўзбекэнерго” вакили.

Ўзбек энергетиги лойиҳани амалга оширишни тезлаштириш учун томонлар бошқа вариантлар, жумладан, боши берк режимни ҳам кўриб чиқишмоқда.

“Биз тожик томонига ҳар қандай кўринишдаги ҳамкорликни ривожлантириш ва уланишни амалга оширишга тайёрлигимизни маълум қилдик. Эндиликда уларнинг жавобини кутмоқдамиз”, - деб қўшимча қилди “Ўзбекэнерго” вакили.

Олдинроқ Тожикистон энергетика ва сув ресурслари вазири Усмонали Усмонзода тожик электр энергиясини Ўзбекистон, Туркманистон ва Қозоғистонга етказиб бериш бўйича техник имкониятларнинг мавжудлиги ҳақида хабар берган эди. “Агар қўшниларимиз ёзда нисбатан арзон электр олишни истасалар, улар мавжуд электр узатиш линиялари орқали бизнинг энергия тизимимизга уланишлари мумкин. Биз узоқ йиллар давомида бекор турган линияларни қайта тиклашимиз мумкин”, - деди вазир.

Усмонзода Тожикистоннинг электр энергия тизимини Ўзбекистон энергетика тизимига улаш имконияти “Барқи Точик” мутахассислари томонидан тўлиқ ўрганилганлигини таъкидлади. У Тожикистон Регар кичик станциясидан Ўзбекистон ҳудудида жойлашган кичик станцияларга уланишга тайёр эканини таъкидлади.

Тожикистон энергетика тизимининг Ўзбекистон энергетика тизими билан параллел ишлашига тайёрлиги тўғрисида “Барқи Тожик” ХК бошлиғининг ўринбосари Маҳмадумар Асозода ҳам айтиб ўтди.

“Биз ҳудудимиздаги электр узатиш линияларининг ҳолати билан танишдик ва аниқланган камчиликларни бартараф этдик”, - деди “Барқи Точик” вакили.

Асозода Регар подстанциясидан 500 кВ электр узатиш линияси, шунингдек, республиканинг шимолий қисмидаги 220 кВлик тўртта линиялар уланишга тайёр эканини таъкидлади. Бундан ташқари, унинг сўзларига кўра, улардан иккитаси доимий қўриқлаш ҳолатида ишлаб турибди.

“Тегишли битим имзоланган ҳолда, “Барқи Тожик” ёзда ушбу линиялар орқали Ўзбекистонга электр энергиясини етказиб беришга тайёр”, - деб қўшимча қилди Асозода.