Ўзбекистон Туризмни ривожлантириш қўмитаси Индонезиянинг Бали оролидаги Агунг вулқони уйғонгани ҳақида огоҳлантирди

Тошкент. 1 декабр. ЎзТАГ – Ўзбекистон Туризмни ривожлантириш давлат қўмитаси Индонезияга боришни режалаштираётган туристларни Бали оролидаги Агунг вулқони уйғонгани ҳақида огоҳлантирди, деб хабар беради Ўзбек телеграф агентлиги (ЎзТАГ).

Вулқонга энг юқори хавфлилик даражаси берилган.

Бу ерда уч марта 4000 м баландликка эга бўлган кул устуни қайд этилган. Ҳозирда 12 кмлик ҳудуд талофат ҳудуди деб эълон қилинган. Ҳудудда 100 минг киши истиқомат қилувчи 22 та қишлоқ жойлашган. Айни пайтда 40 минг киши эвакуация қилинди. Вулқон отилиши муносабати билан Денпасардаги халқаро аэропорт фаолияти тўхтатилиб, 445 халқаро рейслар бекор қилинди ва бу 59 минг йўловчига таъсир кўрсатди.

Эслатиб ўтамизки, ушбу вулқон сентябрда ҳам ҳаракатга келган эди. Ўшанда 144 мингдан зиёд киши эвакуация қилинган эди.

Агунг вулқони сўнгги бор 1963 йилда қаттиқ уйғонган бўлиб, ўшанда 1000 дан ортиқ киши ҳалок бўлган эди.

Индонезияга бормоқчи бўлган Ўзбекисон фуқаролари ва сайёҳлик компанияларига Балида вужудга келган ноқулай ҳолатни ҳисобга олиш тавсия этилади.