Ўзбекистон Украинадан шакар импортини тўхтатиб қўйди

Тошкент. 3 декабр. ЎзТАГ – Ўзбекистон Украинадан шакар импортини тўхтатиб қўйди, деб хабар беради Ўзбек телеграф агентлиги (ЎзТАГ).

Украина Шакар ишлаб чиқарувчилари миллий ассоциацияси маълумотларига кўра, ҳозирда Ўзбекистонга етказилаётган шакар ва бошқа юклар туширилмаяпти ва божхонадан ўтказилмаяпти. Шундан сўнг маълум қилинишича, ушбу вазият ҳукуматнинг Украинадан юкларни қабул қилмаслик фармойиши билан боғлиқ.

“Тўсатдан юзага келган бундай ҳолат аввал имзоланган шартномалар шартларининг бажарилмаслигига олиб келмоқда. Сўнгги ярим йилда шакарнинг асосий импортчиси айнан Ўзбекистон бўлганини ҳисобга олсак, айтишимиз мумкинки, биз асосий истеъмол бозоримизни йўқотмоқдамиз”, - дея изоҳ берди уюшманинг таҳлил бўлими бошлиғи Руслана Бутило.

“Укрцукор” уюшмаси Аграр ва озиқ-овқат сиёсати вазирлиги ҳамда Иқтисодий ривожланиш ва савдо вазирлигига тушунтириш бериш ва украин маҳсулотларини Ўзбекистон ҳудудига ташишдаги муаммоларни ҳал этиш юзасидан илтимоснома йўллади.

Эслатиб ўтамиз, 2017-2018 йилларда Украина ташқи бозорга 560,4 минг тонна шакар етказиб берган бўлса, унинг асосий импортчиси айнан Ўзбекистон бўлган. Бу мамлакатга Украинадан 209,9 минг тонна ёхуд $79,1 млнлик шакар импорт қилинган.

Сурат манбаи: https://agroday.com.ua