Ўзбекистон ҳукумати суюлтирилган газга ягона чакана нархларни икки босқичда жорий этади
Тошкент. 5 январ. ЎзТАГ – Ўзбекистон ҳукумати суюлтирилган газга ягона чакана нархларни икки босқичда, 1 кг учун ҚҚС ҳисобга олган ҳолда 2018 йил 1 апрелдан 500 сўмдан 720 сўмгача ва 2018 йил 1 августдан 800 сўмдан қилиб жорий этади, деб хабар беради Ўзбек телеграф агентлиги (ЎзТАГ).
Бу Ўзбекистон Вазирлар Маҳкамасининг “Аҳолига кундалик ҳаётда истеъмол қилиш учун сотиладиган суюлтирилган газнинг республика бўйича ягона чакана нархини босқичма-босқич жорий этиш тўғрисида”ги қарори билан кўзда тутилган.
Эслатиб ўтамизки, Ўзбекистон президентининг 2017 йил 4 сентябрдаги ПҚ-3253 қарори билан мамлакат аҳолисига суюлтирилган газни сотишда 1994 йил 1 октябрдан бери қўлланиб келган шартнома (эркин) нархлар ўрнига ягона белгиланган нархга ўтиш кўзда тутилган.
Ўзбекистонда ягона чакана нарх икки босқичда жорий этилади. “Ўзтрансгаз”АЖ ва унинг ҳудудий филиаллари аҳолига кундалик ҳаётда истеъмол қилиш учун сотиладиган суюлтирилган газни 2018 йил 1 апрелдан вилоятлар кесимида фарқланадиган 1 кг учун ҚҚС ҳисобга олган ҳолда 500 сўмдан 720 сўмгача ва 2018 йил 1 августдан ягона нарх – 800 сўмдан сота бошлайди.
Сурат манбаи: http://today.kz/news/ekonomika/2016-06-30/721075-s-1-iyulya-v-almatyi-vyirastet-tsena-na-gaz/
