Ўзбекистон ва Буюк Британия шериклик ва ҳамкорлик тўғрисидаги битимни имзоладилар
Тошкент. 1 ноябрь. ЎзТАГ – Ўзбекистон ва Буюк Британия шериклик ва ҳамкорлик тўғрисидаги битимни имзоладилар, дея хабар беради Ўзбек телеграф агентлиги (ЎзТАГ).
"31 октябрь куни Ўзбекистон ташқи ишлар вазири Абдулазиз Комилов ва Буюк Британиянинг фавқулодда ва мухтор элчиси Тимоти Торлот Ўзбекистон Республикаси билан Буюк Британия ва Шимолий Ирландия Бирлашган Қироллиги ўртасида шериклик ва ҳамкорлик тўғрисидаги битимни имзоладилар", - дейилади Ташқи ишлар вазирлиги матбуот хизмати хабарида.
Қайд этилганидек, битим сиёсий, савдо-иқтисодий, саноат, транспорт, қишлоқ хўжалиги, энергетика, илмий-техникавий, молиявий ва бошқа соҳалардаги томонларнинг мавжуд ҳуқуқий асосларини сақлаш ва ўзаро муносабатларини ривожлантиришга қаратилган комплекс характердаги ҳужжатдир.
Ҳужжат Буюк Британиянинг Европа Иттифоқидан (ЕИ) чиқиб кетганидан сўнг Ўзбекистон-Буюк Британия ҳамкорлигининг шартнома муносабатларининг давомийлигини таъминлаш ва барча соҳаларда ҳар томонлама амалий муносабатини янада ривожлантиришга хизмат қилади.
"Шартнома томонларнинг ички тартиб-таомилларнинг бажарилиши тўғрисида охирги ёзма хабарнома олинган санадан кейинги ойнинг биринчи кунида кучга киради. Ҳужжатда, шунингдек, шартномани кучга киргунга қадар вақтинча қўллаш имконияти ҳам кўзда тутилган", - деб якунланади хабар.
Сурат манбаи: mfa.uz
