Ўзбекистон ва Европа инвестиция банки ҳамкорликка доир битим лойиҳасини келишиб олдилар
Тошкент. 21 июл. ЎзТАГ – 2017-йилнинг 19-июл куни Люксембург шаҳрида Ўзбекистон Республикаси Ташқи ишлар вазирлиги делегацияси Европа инвестиция банкининг (ЕИБ) экспертлари билан учрашув ўтказди, деб хабар беради Ўзбек телеграф агентлиги (ЎзТАГ).
“Мазкур банк бош қароргоҳида бўлиб ўтган музокараларда ЕИБнинг Ўзбекистон ҳудудида фаолият юритиши тўғрисидаги Ҳадли битим лойиҳаси муҳокама қилинди. Суҳбат чоғида таъкидланганидек, жорий йилнинг 10 ва 12-июлида банк ва Ўзбекистон ваколатли идораларининг экспертлари ўртасида ўтказилган телеконференциялар якуни натижасида Битим лойиҳаси матни бўйича сезиларли силжишга эришилди”, - деб таъкидлашди ТИВ матбуот хизматида.
Учрашувда икки томон экспертлари ҳужжат лойиҳасини маъқулладилар ва битимни тез фурсатда имзолаш бўйича ички давлат тартиботларини якунлаш тўғрисида келишувга эришдилар.
Эслатиб ўтамизки, олдинроқ Ўзбекистон Европа инвестиция банкининг маблағларини муқобил энергетика,замонавий энергиятежовчи технологиялар соҳаларига жалб қилишга қизиқиш билдирган эди.
