Ўзбекистон ва Голландия қишлоқ хўжалигида қўшма лойиҳаларни амалга ошириш масалаларини муҳокама қилдилар

Дата: 12:12, 21-01-2019.

Тошкент. 21 январ. ЎзТАГ – Ўзбекистон ва Голландия қишлоқ хўжалигида қўшма лойиҳаларни амалга ошириш масалаларини муҳокама қилдилар, деб хабар беради Ўзбек телеграф агентлиги (ЎзТАГ).

“18 январ куни ўзбек делегациясининг Берлиндаги 84 “Яшил ҳафталик – 2019” халқаро кўргазмасида иштироки доирасида Ўзбекистон Инновацион ривожланиш вазирининг ўринбосари Ойбек Норинбоевнинг Голландия Қироллигининг қишлоқ хўжалиги вазирининг ўринбосари Маржолийн Соннем билан музокаралари бўлиб ўтди”, -дейилади Ўзбекистон Ташқи ишлар вазирлиги матбуот хизматининг хабарида.

Ўзбекистоннинг Бенелюкс ва Голландиядаги элчихоналари (қароргоҳи Москва) маълумотларига кўра, томонлар илгари икки давлат дипломатик ваколатхоналари томонидан ишлаб чиқилган 2019 йилга мўлжалланган биргаликдаги режаларни батафсил муҳокама қилдилар. Хусусан, голланд томони Тошкент ва Наманганда ўтказиладиган AgroWorld, FlowerExpo ва Tech Agro каби кўргазмаларда кўплаб голланд компанияларининг иштирокини тасдиқлади.

М. Соннема делегация Ўзбекистондаги сафари чоғида савдо ва сармоявий масалаларни муҳокама қилиш, қишлоқ хўжалиги салоҳияти, минтақанинг бизнес муҳитини ўрганиш учун Наманган вилоятига ташриф буюришини тасдиқлади.

Таъкидланишича, томонлар 2019 йил июн ойида Тошкентда AgroTech Ўзбекистон халқаро кўргазмасида Голландиянинг катта павилонини ташкил этишга келишиб олдилар. Голландияликлар Ўзбекистондаги амалий семинарларни ташкил этиш учун очиқ эканига ишонтирди ва ўзбек компанияларини Голландиядаги Floriada гуллар кўргазмасида иштирок этишга таклиф қилди.

Ўз навбатида, ўзбек томони Голландия компанияларини 2019 йил май ойида Тошкент ва Наманган шаҳарларида FlowerExpo халқаро кўргазмасида иштирок этишга таклиф қилди.

“Умуман, томонлар икки мамлакатнинг дипломатик ваколатхоналари орқали ишлаб чиқилаётган таклифлар ва лойиҳалар асосида ўзаро манфаатли алоқаларни йўлга қўйиш ва ҳамкорликни кенгайтиришдан манфаатдорликларини тасдиқладилар”, - деб хулоса қилинади хабарда.

Сурат манбаи: https://rg.ru

Янгилик билан ўртоқлашиш: