Ўзбекистон ва Хитой стандартлаштириш соҳасидаги ҳамкорликни ривожлантиришмоқда
Тошкент. 16 август. ЎзТАГ – “Ўзстандарт” агентлигида Нанкин (Хитой) шаҳрининг Сифат ва техник назорат бўйича агентлиги вакиллари билан учрашув бўлиб ўтди, деб хабар беради Ўзбек телеграф агентлиги (ЎзТАГ).
“Ўзстандарт” маълумотларига кўра, учрашувда турли соҳаларда иккитомонлама ҳамкорлик, шу жумладан, газ баллон ускуналарининг назорати соҳасида ҳамкорлик қилиш имкониятлари муҳокама қилинди.
Ташриф давомида Нанкин шаҳрининг Сифат ва техник назорат бўйича агентлиги вакиллари “Ўзстандарт” агентлигининг синов лабораториялари фаолияти билан танишишди, сифатни бошқариш соҳасида ўзаро тажриба алмашишди ва келгусидаги ҳамкорлик имкониятлари ҳақида фикр алмашишди.
Эслатиб ўтамизки, Нанкин шаҳрининг Сифат ва техник назорат бўйича агентлиги ҳукумат маъмурий идораларининг таркибий қисми ҳисобланиб, шаҳар бўйича маҳсулотлар сифатининг комплекс бошқарувини амалга оширади, шунингдек, сертификатлаштириш ва аккредитция қилиш, стандартлаштириш, метрология, маҳсулотлар сифатининг текшируви ва экспертизаси билан шуғулланади.
