Ўзбекистон ва Қозоғистон чегаралар демаркацияси бўйича якуний хужжатларни тайёрламоқдалар
Тошкент. 3 март. ЎзТАГ – 18-27 февралда Алматида Ўзбекистон-Қозоғистон Қўшма демаркация комиссиясида ишчи гуруҳлар учрашуви ҳамда Ўзбекистон Республикаси ва Қозоғистон Республикаси Ҳукумат делегацияларининг йиғилиши бўлиб ўтди. Бу ҳақида ўзбек ТИВ матбуот хизмати хабар қилди.
“Тадбирлар Ўзбекистон-Қозоғистон Давлат чегараси демаркациясига оид якуний ҳужжатларни тайёрлаш мақсадида ташкил этилган эди. Музокаралар дўстона қўшничилик руҳида ва бир-бирининг манфаатларини инобатга олган ҳолда бўлиб ўтди”, - деб таъкидланади хабарда.
Эслатиб ўтамизки, 2015 йилнинг 4 декабрида ўзбек-қозоқ чегарасида ўтиш пунктлари хақидаги келишув кучга кирди. Юқоридаги келишувга ўзгартиш ва қўшимчалар киритиш ҳақидаги хужжат 2012 йил 7 сентябрда Астанада имзоланган эди.
Хужжатга мувофиқ, ўтиш пунктлари рўйхатига аниқлаштиришлар киритилган, жумладан, қўшимча темир йўл пункти киритилган ва тўрт автомобил пунктлари оптималлаштирилган.
Хитойнинг “Синьхуа” агентлиги маълумотига кўра, Қозоғистоннинг Ўзбекистон билан умумий чегараси 2203 км.
