Ўзбекистон ва Россия МОҚ спорт соҳасидаги ҳамкорлик тўғрисида меморандум имзоладилар

Тошкент. 17 апрел. ЎзТАГ – Ўзбекистон ва Россия Миллий олимпия қўмиталари спорт соҳасида ҳамкорлик тўғрисидаги меморандумни имзоладилар, деб хабар беради Ўзбек телеграф агентлиги (ЎзТАГ).

Ҳужжат Ўзбекистон Миллий Олимпия қўмитаси раиси Умид Аҳмаджоновнинг Москвага ташрифи чоғида имзоланди. У бу ерда Россия Миллий олимпия қўмитаси президенти, Халқаро Олимпия қўмитаси вакили Александр Жуков билан учрашди.

Миллий Олимпия қўмитасининг матбуот хизмати хабар беришича, учрашув давомида спорт муаммолари ва уларни ҳал қилиш йўллари муҳокама қилинди.

“Айни пайтда Россия спорти янги босқичга қадам қўймоқда. Ўтмишдаги муаммолар ўрганилиб, таҳлил қилинди, халқаро саҳнадаги натижаларни яхшилаш бўйича ишлар бошланди. Кўпчилик рус спортчиларининг катта салоҳиятга эга эканлигини биламиз. Россия Олимпия ўйинларида умумжамоа ҳисобида етакчиларидан бирилиги маълум. Шундан келиб чиқиб, биз ушбу мамлакат спортининг энг яхши жиҳатларини ўрганишга ҳаракат қиламиз. Айниқса, енгил атлетика, сузиш, қишки спорт турлари, волейбол, гимнастика сингари спорт турлари бўйича россияликлардан кўп нарса ўрганишимиз мумкин, - деди Умид Аҳмаджанов.

Ўз навбатида, Александр Жуков Россия спорт соҳасида Ўзбекистон билан ҳамкорлик қилишдан мамнун эканини таъкидлади.

“Биз Ўзбекистоннинг қўллаб-қувватлашини эшитишдан хурсандмиз. Мен биргаликда янги марраларни эгаллашимизга ишонаман. Ўзбекистонда кўплаб иқтидорли ва юқори малакали спортчилар бор”, - деди А.Жуков.

Имзоланган меморандум доирасида икки мамлакат спортчилари иштирокидаги мусобақалар сонини кўпайтириш кўзда тутилган. Шунингдек, таниқли мутахассислар Ўзбекистонда тренинг ва семинарлар ўтказадилар.

Бундан ташқари, ташкил этилаётган Ўзбекистон Жисмоний тарбия ва спорт университети учун тегишли адабиётлар тақдим этилади.

Сурат манбаи: https://nuz.uz/poslednie-novosti/32001-ok-rossii-podpisal-memorandum-o-sotrudnichestve-s-nok-uzbekistana.html