Ўзбекистон ва Тожикистон товар айланмасини ошириш бўйича янги механизмни ишга туширишлари мумкин
Тошкент. 24 июн. ЎзТАГ – Яқин йиллар ичида Ўзбекистон ва Тожикистон янги иқтисодий механизм – экспорт товарлари махсус рўйхатларини тузиш ҳисобига ўзаро товар айланмасини сезиларли даражада оширишлари мумкин, деб хабар беради Ўзбек телеграф агентлиги (ЎзТАГ) Ўзбекистон бош вазирининг ўринбосари Рустам Азимовга асосланган ҳолда.
“Ўзбекистон корхоналари тожик бозорларига замонавий енгил ва юк автомобиллари, автобуслар, қишлоқ хўжалик техникаси, кимё ва электротехника маҳсулотлари ва бошқа кўплаб товарларни етказиб беришга тайёр. Шунингдек, биз Тожикистон маҳсулотларини Ўзбекистонга етказиб бериш масаласини ҳам кўриб чиқишга тайёрмиз. Шу йўналишда кейинчалик етказиб берилиши мумкин бўлган товар позицияларини рўйхатини биргаликда аниқлаштириб олишни таклиф қиламиз”, – деди Р.Азимов мамлакатлар ўртасидаги савдо-иқтисодий ҳамкорлик бўйича ҳукуматлараро комиссиянинг (ҲАК) учинчи мажлиси доирасидаги чиқишида.
Унинг сўзларига кўра, бугун инвестиция ҳамкорлиги доирасида янги қўшма ишлаб чиқаришлар ташкил қилиш имкониятларидан деярли фойдаланилмаяпти.
Эслатиб ўтамизки, куни-кеча Тошкентда савдо-иқтисодий ҳамкорлик бўйича ўзбек-тожик ҲАК учинчи мажлиси бўлиб ўтди.
2014 йил якунлари бўйича Ўзбекистон ва Тожикистон ўртасидаги ўзаро савдо ҳажми $160 млнни, жорий йилнинг январ-апрелида $49,2 млнни ташкил қилди.
Ўзбекистонда тожик капитали иштирокидаги 18 корхоналар фаолият юритмоқда.
