Ўзбекистон ва Япония шаҳар электробусларини ишлаб чиқариш бўйича музокаралар олиб бормоқда
Тошкент. 8 октябрь. ЎзТАГ – Ўзбекистон ва Япония шаҳар электробусларини ишлаб чиқариш бўйича музокаралар олиб бормоқда, дея хабар беради Ўзбек телеграф агентлиги (ЎзТАГ).
7 октябрь куни Ўзбекистон президенти Шавкат Мирзиёевнинг хорижий ҳамкорлар билан эришилган келишувларни амалга ошириш, шунингдек, янги инвестиция ва ижтимоий-иқтисодий лойиҳалар муҳокамасига бағишланган йиғилишида шулар ҳақида сўз юритилди.
"Йил охирида президентнинг Японияга ташрифи режалаштирилган. Тадбирга тайёргарлик кўриш доирасида энергетика, транспорт, қишлоқ хўжалиги, хизмат кўрсатиш соҳаларида лойиҳаларни амалга ошириш бўйича келишувларга эришилди. Кимё маҳсулотлари ишлаб чиқариш, Япония технологиялари бўйича электр станциясини қуриш, сув тозалаш ва сув таъминоти тизимини модернизация қилиш, шаҳар электр энергиясини ишлаб чиқаришга йўналтирилган лойиҳалар бўйича ҳам музокаралар олиб борилмоқда", - дейилади президент матбуот хизмати хабарида.
Йиғилишда Ўзбекистон-Япония савдо-иқтисодий ва сармоявий ҳамкорлигининг олий даражадаги ташрифига тайёргарлик кўриш ва унинг ҳолати ҳақида маълумот берилганлиги таъкидланди.
Шунингдек, БАА билан ҳамкорликда инвестиция лойиҳаларини амалга ошириш кўриб чиқилди. Дастурда Самарқанд инфратузилмасини $300 млнга ривожлантириш, $200 млнлик шамол электр станциялари қуришга ва Навоий вилоятида $150 млнлик қуёш электр станциясини қуриш, Сирдарё вилоятида $203 млнга селлюлоза, омухта ем ва қурилиш материаллари ишлаб чиқарувчи агрокластер ташкил этиш каби қатор лойиҳалар ўрин олган.
Шу билан бирга, Қўқон ва Марғилон шаҳарларини 2020-2022 йилларда комплекс ижтимоий-иқтисодий ривожлантириш дастури ҳам муҳокама қилинди, бу эса Қўқон шаҳрида $420 млнлик 250 лойиҳани ва Марғилонда $192 млнлик 172 лойиҳани амалга оширишни назарда тутади. Маблағлар шаҳар инфратузилмасини ривожлантириш, ижтимоий шароитларни яхшилаш ва янги уй-жойлар қуришга йўналтирилади.
Қайд этиладики, давлатимиз раҳбари янги лойиҳалар бўйича музокараларни жадаллаштириш ва қурилиш ишларига тайёргарлик кўриш бўйича топшириқлар берди.
Бундан ташқари, 2019 йилнинг январь-сентябрь ойларида экспорт ва инвестициялар прогнозларини бажариш ҳолати ва йил охирига қадар давом этадиган чора-тадбирлар, шунингдек, Тошкентда бўлиб ўтган туркий тилли давлатлар ишбилармонлар кенгаши ва инвестиция форуми йиғилишининг якунлари кўриб чиқилди.
Сурат манбаи: vedomosti.ru
