Ўзбекистон ЯИДХПда бизнес учун янги хизмат йўлга қўйилди
Тошкент. 12 феврал. ЎзТАГ – Ўзбекистонда менежмент тизимини сертификатлаштириш учун ариза юбориш ва сертификат олишни Ягона интерактив давлат хизматлари портали (ЯИДХП) орқали амалга ошириш мумкин, дея хабар беради Ўзбек телеграф агентлиги (ЎзТАГ).
Давлат Алоқа қўмитасидан хабар қилишларича, бу хизмат ЯИДХПда рўйхатдан ўтган юридик шахсларга мўлжалланган. Улар менежмент тизимини сертификатлаштириш бўйича ташкилот – “Ўзстандарт” Агентлигининг Ўзбекистон стандартлаштириш, метрология ва сертификатлаштириш илмий-тадқиқот институтига (СМСИТИ) ариза юбориши ва сертификат олиши мумкин.
Хизмат икки босқичдан иборат. Биринчи босқичда ариза берувчи электрон шаклдаги аризани тўлдиради ва 3 кун ичида тегишли шартнома лойиҳасини олади. Иккинчи босқичда ариза берувчи имзоланган шартномага асосан тўловни амалга ошириши билан биргаликда менежмент тизимини сертификатлаш органи томонидан аудит ўтказилгандан сўнг менежмент тизими сертификатини олади.
