Ўзбекистон ёшлар термаси Осиё чемпионати финалига чиқиш имкониятини деярли йўқотди
Тошкент. 2 апрел. ЎзТАГ - Ўзбекистон ёшлар термаси Осиё чемпионати финалига чиқиш имкониятини деярли йўқотди. Бу Бангладешда ёшлар ўртасида футбол бўйича 2015 йилги Осиё чемпионати саралаш босқичи ўйинлари тугалланишидан кейин маълум бўлди, дея хабар беради Ўзбек телеграф агентлиги (ЎзТАГ).
“Ўзбекистон ёшлар термаси уч ўйин якунлари бўйича 6 очко жамғарди ва қитъа биринчилигининг финал қисмига чиқиш имкониятидан деярли маҳрум бўлди. Ўзбекистон саралаш босқичида Ҳиндистонни 2:0, Бангладешни 4:0 ҳисобларида енгиб, асосий рақиби Сурияга 1:2 ҳисобида енгилди”, - деб таъкидлашди Футбо федерацияси матбуот хизматида.
Малака босқичи регламентига кўра, турнир финал қисмига мавжуд ўн гуруҳ ғолиблари, шунингдек, гуруҳларда иккинчи ўринни олган бешта жамоа кўрсаткичларидан келиб чиққан ҳолда ўтади. Ҳозирда Ўзбекистон термаси кўрсакичлар бўйича Осиё чемпионатига йўлланма берувчи бешинчи ўринни эгаллаб турибди. Аммо уни “В” гуруҳадаги термалар – Иордания, Қувайт, Қирғизистон ва Покистон чиқариб юбориши мумкин. Ушбу термалар саралаш турнирни апрел ўртасида ўтказади.
