Ўзбекистон йирик халқаро футбол турнирларини қабул қилиши мумкин

Тошкент. 17 сентябрь. ЎзТАГ – Ўзбекистон йирик халқаро футбол турнирларини қабул қилиши мумкин, дея хабар беради Ўзбек телеграф агентлиги (ЎзТАГ).

Бу ҳақда 16 сентябрь куни Ўзбекистон президенти Шавкат Мирзиёев ва Осиё футбол конфедерацияси (ОФК) президенти Шайх Салмон бин Иброҳим Ал Халифа ўртасидаги учрашувда сўз юритилди.

"Учрашувда Ўзбекистон билан ОФК ўртасидаги ўзаро манфаатли ҳамкорликни янада кенгайтириш масалалари кўриб чиқилди. Мамлакатимизда ўсмирлар, ёшлар ва хотин-қизлар жамоалари ўртасида йирик халқаро футбол мусобақалари, жумладан, жаҳон ва қитъа биринчиликларини ташкил этиш имкониятлари қайд этилди", - дейилади Ўзбекистон президенти матбуот хизмати хабарида.

Шунингдек, конфедерация томонидан Ўзбекистонда жаҳон даражасидаги футбол инфратузилмасини яратиш, иқтидорли ёшларни методик таъминлаш, қўллаб-қувватлаш, юқори малакали мутахассислар, мураббийлар ва ҳакамлар таркибини тайёрлашга кўмаклашиш муҳимлиги қайд этилди.

ОФК Ўзбекистон билан кенг кўламли ҳамкорликни кенгайтириш, шунингдек, янги дастур ва амалий ҳамкорлик лойиҳаларини биргаликда илгари суришга тайёр эканини таъкидлади.

Сурат манбаи: president.uz