Ўзбекистон юкларининг ярмидан кўпи ва йўловчиларининг тўртдан уч қисми темир йўллар орқали ташилмоқда
Тошкент. 7 ноябр. ЎзТАГ - Ўзбекистондаги юкларининг ярмидан кўпи ва йўловчиларининг тўртдан уч қисми темир йўллар орқали ташилмоқда, дея хабар беради Ўзбек телеграф агентлиги (ЎзТАГ).
Бу ҳақидаги маълумот Ўзбекистон президенти Ислом Каримовнинг “Ўзбекистон темир йўллари” давлат акциядорлик компанияси ташкил этилганининг 20 йиллиги билан йўллаган табригида мавжуд.
“Агарки мана шундай темир йўллар бўлмаса, биз қандай ҳаёт кечиришимиз, иқтисодиётимизни қандай ривожлантириш мумкинлигини тасаввур қилишнинг ўзи ҳам қийин бўларди. Ҳозирги вақтда мамлакатимиз бўйича юкларнинг 60 фоиздан зиёди, йўловчиларнинг эса 75 фоиздан ортиғи темир йўл транспорти орқали ташилмоқда”, – деди давлат раҳбари.
Ва, темир йўлларнинг салоҳияти ҳали тўлиқ очилгани йўқ.
“Кейинги йилларда темирйўлчиларимизнинг куч-ғайрати билан 1 минг 100 километрдан зиёд янги темир йўл тармоқлари барпо этилди, 3 минг 800 километрлик йўл модернизация қилинди ва қайтадан ишга туширилди, қарийб 1000 километрлик темир йўл магистраллари электрлаштирилди. Ана шундай катта ишларимиз натижасида темир йўлларнинг умумий узунлиги 6 минг 500 километрга етди ва улар республикамизнинг барча минтақаларини қамраб олиш имконига эга бўлди”, – деб таъкидлади Ислом Каримов.
