Ўзбекистон жорий йилнинг биринчи олти ойида ўзлаштирилган инвестициялар ҳажмини 9,8% кўпайтирди

Тошкент. 17 июл. ЎзТАГ – 2015 йилнинг биринчи олти ойида Ўзбекистон ўзлаштирилган инвестициялар ҳажмини 9,8% кўпайтирди, шу жумладан, тўғридан-тўғри хорижий инвестиция ва кредитлар 10,9% ўсди, деб хабар беради Ўзбек телеграф агентлиги (ЎзТАГ).

Ушбу маълумотлар куни-кеча Тошкентда Вазирлар Маҳкамасининг республикани ижтимоий-иқтисодий ривожлантириш якунларига бағишланган мажлисда эълон қилинди.

“Мамлакатда 2015 йилги Инвестиция дастури доирасида 63та инвестиция лойиҳасини амалга ошириш тугалланди. 1866та ишлаб чиқариш объекти фойдаланишга топширилди. Маҳаллийлаштирилган маҳсулотларнинг 585та янги турини ишлаб чиқариш ўзлаштирилди. Инвестиция жараёнларининг фаоллашуви пудрат қурилиш ишлари ҳажмининг 18% ўсишига кўмаклашди”, – деб таъкидланади ҳукуматнинг ҳисоботида.

Аҳоли бандлиги муаммосини ҳал қилиш бўйича амалга оширилаётган тизимли чора-тадбирлар туфайли 2015 йилнинг биринчи ярим йиллигида 441,8 мингта янги иш ўрни яратилиб, булардан 274,9 минг иш ўрни ёки 62,2% қишлоқ жойларда ташкил этилди.