Ўзбекистон ўзининг ТАПИ лойиҳасига қўшилганлигини радъ этди
Тошкент. 15 июн. ЎзТАГ – Ўзбекистон ҳозирча ТАПИ газ қувури қурилиши лойиҳасига қўшилганлиги ҳақида расмий баёнотлар қилгани йўқ, деб хабар беради Ўзбек телеграф агентлиги (ЎзТАГ) “Ўзбекнефтгаз” миллий холдинг компанияси бошқарув раиси Алишер Султоновнинг баёнотига асосланган ҳолда.
“Туркман томони бизга ТАПИда қатнашишни таклиф қилди. Ўз навбатида Ўзбекистон президенти компанияга ушбу масалани ўрганишни топширди. Аммо ҳозирча Ўзбекистон ТАПИ газ қувури қурилиши лойиҳасига қўшилганлиги ҳақида расмий баёнот мавжуд эмас. Келинг, ТАПИнинг қандай лойиҳалигини кўриб чиқайлик. Агар қисқа қилиб айтса, бу газ етказиб бериш йўналишларини диверсификация қилиш учун катта имконият. Шундан келиб чиқсак, бундан нега фойдаланмаслик керак?”, - деб таъкидлади ўзбек нефтегаз холдинги раҳбари.
Султоновнинг сўзларига кўра, ТАПИ – энг аввало иқтисодий лойиҳа бўлиб, Марказий Осиё газини Покистон ва Ҳиндистонга етказиб беришни кўзда тутади.
“Ҳозирда туркман ҳамкасбларимиз 1735 километр ҳудудда ишни ташкил қилиб бера олувчи лойиҳа операторини танлашмоқда. Бу мураккаб, лекин ажойиб лойиҳа. Бу қимматга тушадиган лойиҳа, шунинг учун унинг барча жиҳатларини ўрганиб чиқиш керак. Биз буларни ўрганмоқдамиз”, - деди Алишер Султонов.
Эслатиб ўтамизки, ТАПИ – Туркманистондан Афғонистон, Покистон ва Ҳиндистонга тортиладиган магистраль газ қувури. Унинг лойиҳа қуввати йилига 33 млрд кубометр газга тенг, тахминий қиймати $7,9 млрд.
