Ўзбекистонда 1,8 минг кмдан зиёд оптик толали алоқа линиялари қурилди
Тошкент. 21 январ. ЎзТАГ - 2015 йилда Ўзбекистонда интернетга юқори тезликда уланишни ривожлантириш мақсадларида 1,8 минг кмдан зиёд оптик толали алоқа линиялари қурилди, деб хабар беради Ўзбек телеграф агентлиги (ЎзТАГ).
Бу ҳақида Ахборот технологиялари ва коммуникацияларни ривожлантириш вазирлигининг яқинда бўлиб ўтган коллегиясининг 2015 йил якунларига бағишланган йиғилишида маълум қилинди.
Хусусан, Тошкент-Бухоро участкасида DWDM технологияси бўйича 100 Гбит/секунд тезликка эга алоқа линияси фойдаланишга топширилди.
Магистрал тармоқларини янада кенгайтириш бўйича ишлар доирасида янги телекоммуникация ускуналари ўрнатилди. Бу эса халқаро йўналишдаги ўтказиш тезлигини 10 карра, республиканинг ҳар вилоятигача тезликни 4 каррага, туман марказларигача тезликни 10 каррага кўпайтиришга имкон берди. Шу билан бирга, Тошкент шаҳри телекоммуникацион тармоғининг ўтказиш тезлиги 10 карра кўпайтирилди.
