Ўзбекистонда 13,6 мингдан зиёд янги бизнес субъектлар ташкил этилди
Тошкент. 14 апрел. ЎзТАГ – 2017 йилнинг биринчи чорагида Ўзбекистонда 13646 янги бизнес субъектлари (деҳқон ва фермер хўжаликларидан ташқари) ташкил этилди, деб хабар беради Ўзбек телеграф агентлиги (ЎзТАГ).
Давлат статистика қўмитаси маълумотларига кўра, натижада 2017 йил 1 апрел ҳолатига фаолият кўрсатаётган кичик тадбиркорлик субъектларининг сони 222015 тани ташкил этиб, ўтган йилнинг шу даврига нисбатан 18193 тага кўпайди.
Ҳисобот даврида кичик бизнеснинг ялпи ички маҳсулотидаги улуши 44,9%ни (2016 йилнинг январ-март ойларида 43,1%), саноатда 41,6%ни (37,3 фоиз), хизматлар соҳасида 58,0 %ни (57,1%), экспортда 28,1%ни (23,3%) ва бандликда 77,7%ни (77,4%) ташкил этди.
Кичик бизнес ва хусусий тадбиркорлик субъектлари томонидан иқтисодиётга 3992,5 млрд сўмлик инвестициялар киритилди. Бу республика бўйича жами киритилган инвестициялар ҳажмининг 41,2%ини ташкил этади. Шунингдек, улар томонидан 4843,8 млрд сўмлик қурилиш ишлари бажарилди (жами қурилиш ишлари ҳажмининг 69,9%и) ёки ўтган йилнинг шу даврига нисбатан 14,9%га ўсди.
