Ўзбекистонда 30 кунлик ягона туристик виза жорий этилди

Тошкент. 5 декабр. ЎзТАГ – Ўзбекистонда якка тартибда келаётган хорижий фуқаролар учун 30 кунлик ягона туристик виза жорий этилди, деб хабар беради Ўзбек телеграф агентлиги (ЎзТАГ).

Бунга қадар чет эл фуқаролари 7 ёки 15 кунга сайёҳлик визасини олиб, рейслар ушланиб қолганида ёки бошқа сабабларга кўра визаларнинг амал қилиш муддатини узайтириш муаммосига дуч келар эди.

Мазкур чоралар Ўзбекистон Президенти Шавкат Мирзиёевнинг 4 декабрдаги қарори билан кўзда тутилган бўлиб, Туризмни ривожлантириш давлат қўмитаси маълумотига кўра, 2018-2019 йилларда туризмни ривожлантириш бўйича биринчи навбатдаги чора-тадбирлар дастури доирасида қабул қилинган.

Бундан ташқари, кириш визаларини расмийлаштириш қиймати якка чет эллик сайёҳлар учун $60дан $40қача пасайтирилди.

Шу билан бирга, гуруҳ учун сайёҳлик визасини расмийлаштириш учун қуйи чегара икки марта – 10 кишидан 5 кишигача камайтирилди. Эндиликда 15 кунлик гуруҳ визаларининг нархи бир сайёҳ учун $15, 30 кунлиги эса $25ни ташкил қилади.