Ўзбекистонда “Аму-Бухоро” канали орқали янги кўприк қурилмоқда

Тошкент. 8 феврал. ЎзТАГ – Халқаро аҳамиятдаги А-380 “Ғузор-Бухоро-Нукус-Бейнов” автомобил йўлининг 184-километрида “Аму-Бухоро” канали устида замонавий кўприк бунёд этилмоқда, деб хабар беради Ўзбек телеграф агентлиги (ЎзТАГ). 

“Ўзавтойўл” АК маълумотига кўра, жорий йилнинг июл ойида мазкур ҳудуддаги эски, 1961 йилда қурилган кўприкнинг бир қисми қулаб тушган эди. Янги кўприкнинг қурилиши Қашқадарё кўприк хўжалигини сақлашга ихтисослашган таъмирлаш-фойдаланиш корхонасига топширилган эди.

Умумий узунлиги 72,5 метр бўлган янги кўприк икки томонлама қатнов қисмига эга бўлиб, ҳар бир қисмининг эни 10 метрдан ортиқ бўлади. Бундан ташқари ҳар иккала томонда ҳам эни қарийб бир ярим метрдан иборат 2 та пиёдалар ўтиш йўлаклари қурилмоқда.

Янги кўприкнинг умумий лойиҳавий қиймати 11,8 млрд сўмдан ортиқ бўлиб, у  Наврўз байрами арафасида фойдаланишга топширилиши мўлжалланмоқда.