Ўзбекистонда ҳар қандай товар ва хизматларга банк картаси орқали тўлашга рухсат берилди
Тошкент. 25 апрел. ЎзТАГ – Ўзбекистон якка тартибдаги тадбиркорларига ҳар қандай товар ва хизматларга банк картаси орқали тўлашга рухсат берилди, деб хабар беради Марказий банк матбуот хизмати.
“Марказий банк “Якка тартибдаги тадбиркорлар томонидан миллий валютадаги банк карталаридан фойдаланиш тартиби тўғрисида”ги низомга ўзгартиришлар киритди”, - дейилади МБ хабарида.
Янги қоидаларга мувофиқ, энди якка тартибдаги тадбиркорлар ўз корпоратив пластик карточкаларини бошқа шахсларга фойдаланиш учун беришлари мумкин.
“Тадбиркорлик фаолиятининг кафолатлари тўғрисида”ги қонунда таъкидланишича, тадбиркорлик фаолияти субъектларининг даромадлари барча чиқим ва тўловлардан сўнг ўз ихтиёрига кўра ишлатилиши мумкин.
“Ушбу меъёрдан келиб чиқиб, якка тартибдаги тадбиркорлар банк карталари орқали нафақат ишлаб чиқариш эҳтиёжлари билан боғлиқ тўловларни амалга оширишлари, балки исталган товарни харид қилишлари ёки исталган кўринишдаги хизматга ҳақ тўлашлари мумкин бўлади”, - дейилади матбуот релизида.
Хабар қилинишича, бундай тўловлар амалга оширилганда квитанция ва счётлар асл нусхалари, уларга илова қилинадиган ва терминал орқали тўловни қабул қилган хизматчи томонидан имзоланган ҳамда "тўланди" печати қўйилган банкомат, инфокиоск ва терминал квитанциялари ҳисобот ҳужжатлари ҳисобланади.
“Эндиликда томонлар, яъни сотувчи ва банк картаси эгаси ўртасида тегишли шартнома тузишга ҳожат йўқ”, - деб хулоса қилинади хабарда.
