Ўзбекистонда қайта парламент сайловлари бўлиб ўтди
Тошкент. 5 январ. ЎзТАГ – Куни кеча Ўзбекистонда қайта парламент сайловлари бўлиб ўтди, дея хабар беради Ўзбек телеграф агентлиги (ЎзТАГ) Марказий сайлов комиссияси (МСК) сайтидаги маълумотга асосланган ҳолда.
Маълумотга мувофиқ, Қорақалпоғистон Республикаси, вилоятлар ва Тошкент шаҳридаги Ўзбекистон Республикаси Олий Мажлиси Қонунчилик палатасига депутатлар сайловини ўтказувчи 22та сайлов округида, шунингдек маҳаллий давлат ҳокимияти вакиллик органларига депутатлар сайловини ўтказувчи 480та сайлов округида такрорий овоз бериш жараёни якунланган.
Сайловчилар юксак фаоллик намоён этганлар. Мазкур тадбирда сиёсий партияларнинг 5,7 мингдан ортиқ кузатувчилари ва ваколатли вакиллари иштирок этиши эса такрорий овоз бериш жараёнининг очиқ ва ошкора ўтказилишида муҳим омил бўлган.
Эслатиб ўтамизки, такрорий овоз беришда иштирок этган сайловчиларнинг овозини бошқа номзодга нисбатан кўпроқ олган депутатликка номзод сайланган, деб ҳисобланади.
Такрорий овоз бериш натижаларига кўра сайланган Ўзбекистон Республикаси Олий Мажлиси Қонунчилик палатаси депутатларининг рўйхати матбуотда эълон қилинади, деб қайд этилади МСК хабарида.
