Ўзбекистонда банкни тугатиш учун эндиликда Марказий банкнинг розилиги эмас, балки рухсати керак

Тошкент. 23 май. ЎзТАГ – Ўзбекистонда банкни тугатиш учун эндиликда Марказий банкнинг розилиги эмас, балки рухсати керак, дея хабар беради Ўзбек телеграф агентлиги (ЎзТАГ).
Ушбу янги меъёр Марказий банк қарори билан жорий этилган бўлиб, уларга мувофиқ, банк фаолиятини тартибга солувчи қонунчиликка ўзгартишлар киритилган. Хужжат Norma.uz сайтида эълон қилинди.
Хусусан, Банкларни тугатиш ҳақидаги низомга киритилган ўзгартишларга мувофиқ, банкни акционерлар ёки таъсисчилар умумий йиғилиши қарорига мувофиқ кўнгилли равишда тугатиш учун илгаригидек Марказий банкнинг розилиги эмас, балки рухсати керак.
Ушбу рухсат Вазирлар Маҳкамасининг 2014 йил 10 мартдаги 56 сон қарори билан тасдиқланган Банк фаолияти соҳасидаги рухсат берувчи тартиблардан ўтиш тўғрисидаги низомга мувофиқ олиниши зарур.
Бундан ташқари, банкларни реорганизация қилиш, низом жамғармаси, акционерлар таркибини ўзгартириш, номи ва жойлашган ўрнини ўзгартириш, банк низомига ўзгартиш ва қўшимчалар киритишни рўйхатдан ўтказиш тартибларига ҳам ўзгартишлар киритилган.